Наўседа: Да кантрабанды беларускіх цыгарэт датычны КДБ, на гэтым зарабляюцца велізарныя грошы

28 кастрычніка, Позірк. Паветраныя шары з беларускімі цыгарэтамі, якія ўрываюцца ў паветраную прастору Літвы, “не з’яўляюцца сродкам кантрабанды”, заявіў 28 кастрычніка журналістам літоўскі прэзідэнт Гітанас Наўседа.

“Кантрабанда ў дадзеным выпадку — гэта толькі падтэкст або сродак для гібрыднай атакі супраць Літвы, і ў нас ёсць мноства доказаў, як прамых, так і ўскосных, што гэта наўмысныя дзеянні, накіраваныя на дэстабілізацыю сітуацыі ў Літве”, — цытуе Наўседу партал Delfi.

Паводле слоў прэзідэнта, у Беларусі “нічога выпадковага” не адбываецца, арганізоўваць масавыя залёты аэрастатаў у суседнюю дзяржаву без ведама ўладаў немагчыма. “Таму цалкам відавочна, што да продажу цыгарэт кампаніямі, якія выпускаюць афіцыйную прадукцыю, а таксама прадукцыю, прызначаную для нелегальнага рынку, датычныя спецыяльныя структуры, КДБ, і што з кожнай кантрабанднай пачкі цыгарэт зарабляюцца велізарныя грошы”, — удакладніў кіраўнік літоўскай дзяржавы.

“Грунтуючыся на некаторых назіраннях”, Наўседа падкрэсліў, што “каля чвэрці цыгарэт, якія прадаюцца ў Літве, — кантрабандныя, а з аднаго пачка можна зарабіць 3–4 еўра”. Паводле яго слоў, “кантрабанда накіраваная на падтрымку і фінансаванне [беларускага] рэжыму, таму ён ёю і цікавіцца”.

“Мы адназначна не пацерпім запускаў паветраных шароў, і літоўскія вайскоўцы гатовыя збіваць гэтыя шары”, — сказаў Наўседа, дадаўшы, што адпаведныя сродкі ў Літвы маюцца, “хоць і ёсць пэўныя абмежаванні”. Зрэшты, сёння, адзначыў ён, “няма сэнсу казаць пра гэта больш падрабязна, паколькі новых выпадкаў парушэння мяжы няма”.

“Над гэтым пытаннем працуюць і на міжнародным узроўні — важна, каб гэта не было толькі літоўскай праблемай. <…> Пагроза авіяцыйнай бяспекі павінна стаць праблемай для ўсёй Еўропы, і гэта ўжо становіцца прыярытэтам ЕС”, — заявіў літоўскі прэзідэнт.

Паводле яго слоў, якія прыводзіць агенцтва BNS, заяўленая Аляксандрам Лукашэнкам 28 кастрычніка гатоўнасць папрасіць прабачэння за кантрабанду кажа аб тым, што “рашэнне аб закрыцці пунктаў пропуску на нявызначаны тэрмін правільнае”.

“Сённяшні зварот Аляксандра Лукашэнкі і яго спроба папрасіць прабачэння — відавочная прыкмета таго, што гэта балюча, што на гэта рэагуюць”, — удакладніў Наўседа.

Літва прыкладна з 22:10 26 кастрычніка закрыла на нявызначаны тэрмін абодва наземныя пункты пропуску на мяжы з Беларуссю — Мядзінінкай (з беларускага боку Каменны Лог) і Шальчынінкай (Беняконі). Гэта было зроблена ў адказ на масавыя залёты на тэрыторыю краіны з Беларусі аэрастатаў, як мяркуецца, з кантрабанднымі цыгарэтамі. Праз гэта чатыры разы прыпыняў працу аэрапорт у Вільнюсе, затрымліваліся і адмяняліся авіярэйсы, пацярпелі тысячы пасажыраў.

27 кастрычніка Літва выказала чарговы рашучы пратэст Беларусі ў сувязі з пастаяннымі парушэннямі паветранай прасторы гэтай балтыйскай дзяржавы.

Беларускі МЗС уручыў ноту часоваму паверанаму ў справах Літвы Эрыкасу Вілканецасу ў сувязі з “аднабаковым закрыццём Літвой мяжы без паведамлення”.

Раней Наўседа прапанаваў абмежаваць транзіт з Беларусі ў Калінінградскую вобласць (РФ) праз залёт у краіну аэрастатаў.