Лукашэнка выказаў упэўненасць у “далейшай пазітыўнай дынаміцы двухбаковых кантактаў” з Турцыяй

29 кастрычніка, Позірк. Упэўненасць у “далейшай пазітыўнай дынаміцы двухбаковых кантактаў” з Турцыяй выказаў Аляксандр Лукашэнка, віншуючы 29 кастрычніка прэзідэнта гэтай краіны Рэджэпа Таіпа Эрдагана з нацыянальным святам — Днём Рэспублікі.

“Вельмі прыемна адзначыць поспехі Турцыі ва ўсіх галінах эканомікі і дзяржаўным развіцці”, — цытуе віншавальніка яго прэс-служба.

Паводле слоў Лукашэнкі, пад кіраўніцтвам Эрдагана “краіна ўпэўнена ідзе па шляху інавацый і рэформаў, адыгрывае ўсё больш важную ролю ў падтрыманні міру і стабільнасці як у рэгіёне, так і на сусветнай арэне”.

“Мінск і Анкара — надзейныя партнёры, якія маюць шматгранныя і плённыя сувязі ў розных сферах — ад гандлю і інвестыцый да культурнага і гуманітарнага абменаў”, — заявіў Лукашэнка, падкрэсліўшы зацікаўленасць у “паглыбленні і інтэнсіфікацыі адносін на карысць народаў” дзвюх краін.

26 лютага 2024-га Лукашэнка, віншуючы Эрдагана з 70-годдзем, выказаў надзею на “хуткую сустрэчу, якая, безумоўна, адкрые новую старонку ў адносінах Мінска і Анкары”.

4 ліпеня мінулага года палітыкі правялі перамовы на палях саміту Шанхайскай арганізацыі супрацоўніцтва ў Астане.

29 кастрычніка 2024 года ў тэксце віншавання турэцкаму лідару з Днём Рэспублікі Лукашэнка адзначыў, што па-ранейшаму гатовы скарыстацца запрашэннем Эрдагана наведаць яго краіну.

30 студзеня гэтага года Эрдаган павіншаваў Лукашэнку з працягам паўнамоцтваў з дапамогай працэдуры, якую ўлады ў Мінску называюць прэзідэнцкімі выбарамі.

Турцыя — член Паўночнаатлантычнага альянсу. Арганізацыя Дагавора аб калектыўнай бяспецы (АДКБ), у якую ўваходзіць Беларусь, дэ-факта лічыць НАТО праціўнікам.

Падрабязныя даныя аб ўзаемным гандлі ў адкрытым доступе не апублікаваныя. “Па выніках 2023 года тавараабарот Беларусі з Турцыяй склаў больш аднаго мільярда долараў”, — гаворыцца на сайце амбасады Беларусі.