У спіс “тэрарыстаў“ унесена восем чалавек, у тым ліку палітвязні

29 кастрычніка, Позірк. Камітэт дзяржаўнай бяспекі дадаў у спіс “асоб, якія маюць дачыненне да тэрарыстычнай дзейнасці“, яшчэ восем чалавек. У абноўленым пераліку, апублікаваным у спецыяльным тэлеграм-канале КДБ 29 кастрычніка, цяпер 1.526 пазіцый (1.400 чалавек).

У спіс унесеныя асуджаныя, прыгаворы якім набылі моц: паводле арт. 361 Крымінальнага кодэкса (заклікі да захадаў абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы) — Вользе Чукаровай, Дзянісу Пяткевічу, Сяргею Лысенку; паводле арт. 293⁵ (арганізацыя дзейнасці тэрарыстычнай арганізацыі і ўдзел у такой арганізацыі) — Сяргею Цімашэнку; паводле арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы) — Андрэю Кавалёву, Віктару Шабаліну, Наталлі Васільевай, Юліі Зароўскай.

Чукарова, Васільева і Цімашэнка прызнаныя палітвязнямі. Раней яны былі ўнесеныя ў “спіс экстрэмістаў”.

Абвешчаным “тэрарыстамі” зняволеным сярод іншага забаронена атрымліваць грашовыя пераводы.