Лукашэнка захапіў уладу толькі дзякуючы жорсткасці, рэпрэсіям і падтрымцы Пуціна — Ціханоўская

29 кастрычніка, Позірк. Цяпер часта забываецца, што беларусы перамаглі на выбарах у 2020 годзе, а Лукашэнка нелегітымны, ён захапіў уладу толькі дзякуючы жорсткасці, рэпрэсіям і падтрымцы Пуціна. Пра гэта заявіла на Парыжскім форуме міру 29 кастрычніка дэмакратычны лідар Святлана Ціханоўская.

Яна выступіла на панэлі “Вяртанне міру ў Еўропу. Новыя кааліцыі за мір”. Яе выступленне транслявалася на ютуб-канале форуму.

Ціханоўская адзначыла, што цяпер чутныя “некаторыя галасы”, якія прапануюць пачаць дыялог з Лукашэнкам. “Мы рабілі гэтую памылку некалькі разоў за ўсю гэтую 30-гадовую гісторыю. Лукашэнка заўсёды будзе спрабаваць падмануць дэмакратычны свет, падмануць еўрапейцаў”, — падкрэсліла прамоўца.

“Санкцыі не мяняюць дыктатараў, але прымушаюць іх мяняць паводзіны, ісці на саступкі. Але калі ў іх шмат шчылін, яны знаходзяць спосабы абысці санкцыі. Ужо больш за паўтара года няма новых санкцый супраць беларускага рэжыму <…>, што стварае адчуванне беспакаранасці”, — падкрэсліла Ціханоўская.

На яе думку, гэта штурхае дыктатараў ісці далей, шантажаваць ядзернай зброяй і размяшчэннем расійскіх ваенных баз у Беларусі. І калі на гэта няма эканамічнага адказу — дыктатары “будуць працягваць”.

Паводле слоў Ціханоўскай, палітыка новага прэзідэнта ЗША Дональда Трампа “больш транзакцыйная, ён хоча хуткіх поспехаў”. Пры гэтым “трансатлантычнае адзінства вельмі важнае”, бо барацьба з дыктатурай “не лакальная, яна глабальная”.

На гэтым фоне Ціханоўская заклікала Еўропу “быць прынцыповай у сваіх пазіцыях, выкарыстоўваць усе свае эканамічныя і палітычныя інструменты, каб спыніць дыктатараў”.

Іншыя падрабязнасці даступныя падпісчыкам “Позірк” (калі спасылка не працуе, карыстайцеся, калі ласка, гэтай)