14-гадовы падлетак асуджаны ў Гродне на 8 гадоў зняволення за распаўсюд наркотыкаў

5 лістапада, Позірк. Суд Кастрычніцкага раёна Гродна прыгаварыў да васьмі гадоў пазбаўлення волі 14-гадовага падлетка, паведамляе гарадская пракуратура.

Фігурант прызнаны вінаватым паводле ч. 4 арт. 328 Крымінальнага кодэкса (незаконны абарот наркатычных сродкаў, псіхатропных рэчываў, іх прэкурсораў і аналагаў).

Згодна з рашэннем суда, пакаранне падлетак будзе адбываць у выхаваўчай калоніі.

Яму быў інкрымінаваны абарот наркотыкаў у складзе арганізаванай групы. Паводле даных следства, навучэнец адной са школ абласнога цэнтра “ў складзе злачыннай супольнасці ўдзельнічаў у незаконным абароце асабліва небяспечнага псіхатропнага рэчыва 4-СМС масай каля 480 грамаў”.

За перыяд супрацьпраўнай дзейнасці непаўнагадовы атрымаў больш за 3 тыс. рублёў, гаворыцца ў паведамленні.

Адзначаецца, што тэрмін пакарання школьніку скарочаны на 1 год паводле закона аб амністыі.

Прыгавор суда ўступіў у законную сілу.

11 жніўня паведамлялася аб затрыманні ў Магілёве 15-гадовай дзяўчынкі — распаўсюджвальніцы наркотыкаў. У момант затрымання пры ёй, а таксама ў схованках “выяўлена і канфіскавана асабліва небяспечнае псіхатропнае рэчыва 4-СМС”.

Следчы камітэт пачаў крымінальную вытворчасць “за незаконны абарот наркотыкаў з мэтай збыту”.

Міністэрства ўнутраных спраў нагадала, што пакаранне за падобныя злачынствы — да 20 гадоў пазбаўлення волі. Крымінальная адказнасць за іх надыходзіць з 14 гадоў.

7 жніўня на прэс-канферэнцыі ў Мінску старшы інспектар па асаблівых даручэннях аддзела па арганізацыі працы інспекцый па справах непаўналетніх упраўлення прафілактыкі галоўнага ўпраўлення па барацьбе з арганізаванай злачыннасцю МУС Раман Бардзееў паведаміў, што за першае паўгоддзе 2025-га супрацоўнікамі МУС спыненая дзейнасць “больш за 25 інтэрнэт-крам, якія займаліся збытам наркотыкаў, абмежаваны доступ да больш чым 77 сайтаў, на якіх размяшчалася рэклама наркомаркетаў”.

23 ліпеня Бардзееў паведаміў, што незаконны абарот наркотыкаў займае першае месца ў структуры ўчыненых падлеткамі цяжкіх і асабліва цяжкіх злачынстваў у першым паўгоддзі 2025 года (22,7%).

Практычна ўсе злачынствы гэтага віду здзяйсняюцца з выкарыстаннем інтэрнэту, падкрэсліў прадстаўнік МУС. Навучэнцы школ і гімназій здзейснілі 17 такіх злачынстваў, ліцэяў і каледжаў — 16, студэнты ВНУ — 1, тыя, хто не навучаецца і не працуе, — 6.

У месцах пазбаўлення волі за здзяйсненне нарказлачынстваў знаходзіцца 286 асоб, якія да асуджэння з’яўляліся навучэнцамі ўстаноў адукацыі, падкрэсліў Бардзееў.

Паводле звестак Вярхоўнага суда, у 2024 годзе ў Беларусі было асуджана 593 непаўналетніх, у 2023-м — 692, 2022-м — 927.

За незаконны абарот наркотыкаў з мэтай збыту было асуджана 68 непаўналетніх (у 2023-м — 61). 96 непаўналетніх было асуджана за злачынствы супраць уласнасці: за крадзеж (арт. 205) — 52, махлярства (арт. 209) — 17, крадзеж транспартнага сродку або маламернага воднага судна (арт. 214) — 10, крадзеж маёмасці шляхам мадыфікацыі камп’ютарнай інфармацыі (арт. 212) — 9, рабаванне (арт. 206) і наўмыснае знішчэнне альбо пашкоджанне чужой маёмасці (арт. 218) — па 3, вымагальніцтва (арт. 208) — 2.

За злачынствы супраць парадку ажыццяўлення эканамічнай дзейнасці, у прыватнасці, за незаконны абарот сродкаў плацяжу і (або) інструментаў (арт. 222) асуджана трое непаўналетніх.