Стасункі Беларусі з Алжырам атрымаецца вывесці на “новы стратэгічны ўзровень”, заяўляе Лукашэнка
Сцяг Алжыра
17 лістапада, Позірк. На сустрэчы з прэзідэнтам Алжыра Абдэльмаджыдам Тэбунам атрымаецца “вызначыць канкрэтныя мерапрыемствы па далейшым паглыбленні” двухбаковага ўзаемадзеяння і “вывесці яго на новы стратэгічны ўзровень”, упэўненасць у гэтым Аляксандр Лукашэнка выказаў 17 лістапада, віншуючы алжырскага кіраўніка з 80-годдзем.
На думку віншавальніка, пасланне якога апублікавала яго прэс-служба, “значны асабісты ўнёсак” Тэбуна ў развіццё Алжыра, умацаванне яго суверэнітэту і паляпшэнне дабрабыту грамадзян “заслугоўвае самай высокай ацэнкі”.
“Алжыр дэманструе дынамічны рост у сферах прамысловасці, сельскай гаспадаркі, адукацыі, аховы здароўя, навукі і інавацый. Гэтыя поспехі з’яўляюцца наглядным сведчаннем вашага імкнення да забеспячэння ўстойлівасці нацыянальнага патэнцыялу і прагрэсу дзяржавы”, — сцвярджае Лукашэнка.
Пра планы “ў хуткім часе” наведаць Алжыр Лукашэнка заявіў 1 лістапада, віншуючы з Днём рэвалюцыі народ гэтай краіны ў Паўночнай Афрыцы і асабіста Тэбуна, які, як сцвярджаецца, і запрасіў беларускага палітыка.
13 лістапада міністр замежных спраў Максім Рыжанкоў прыняў копіі даверчых грамат амбасадара Алжыра ў Расіі і Беларусі па сумяшчальніцтве Туфіка Джуамы. На сустрэчы бакі сярод іншага надалі “асаблівую ўвагу” падрыхтоўцы “будучых кантактаў на вышэйшым узроўні”.
Сам Рыжанкоў наведваў Алжыр у мінулым месяцы. 22 кастрычніка ён сярод іншага перадаў Тэбуну пасланне Лукашэнкі “з бачаннем беларускага боку па развіцці двухбаковай супрацы з акцэнтам на эканоміку”.
На наступны дзень на сустрэчы кіраўніка беларускага МЗС і міністра сельскай гаспадаркі, развіцця сельскіх тэрыторый і рыбалоўства Алжыра Ясіна Мехдзі Уаліда было заяўлена пра неабходнасць павялічыць узаемны тавараабарот.
Паводле даных на сайце знешнепалітычнага ведамства, тавараабарот паміж краінамі ў 2021 годзе склаў 1,01 млн долараў, прычым уся сума прыпала на беларускі экспарт. У асноўным Мінск пастаўляў калійныя ўгнаенні, прасякнутыя ці пакрытыя пластмасамі тэкстыльныя матэрыялы, газетную паперу і канцылярскія вырабы. Актуальных даных ведамства не прыводзіць.
