Дзяржпагранкамітэт атрымаў апавяшчэнне аб адкрыцці Літвой пунктаў пропуску
19 лістапада, Позірк. Дзяржпагранкамітэт Беларусі атрымаў афіцыйнае апавяшчэнне літоўскага боку аб адкрыцці двух пунктаў пропуску на мяжы, паведамляе прэс-служба ДПК.
“У чацвер, 20 лістапада, з 01:00 па мінскім часе ўлады Літвы плануюць адкрыць пункты пропуску Каменны Лог — Мядзінінкай і Беняконі — Шальчынінкай”, — гаворыцца ў рэлізе.
Афіцыйнае апавяшчэнне ад Службы аховы дзяржаўнай мяжы Літвы “увечары 19 лістапада паступіла ў Дзяржпагранкамітэт па лініі пагранпрадстаўніцкай дзейнасці”.
Пагранічная служба Беларусі, як сцвярджаецца, гатова да аднаўлення пропуску асоб і транспартных сродкаў.
Паведамленне апублікавана праз 1 гадзіну 40 хвілін пасля рэлізу ў неафіцыйным тэлеграм-канале прэс-службы Аляксандра Лукашэнкі “Пул Первого” па выніках міжведамаснай нарады аб “актуальнай сітуацыі на беларуска-літоўскай мяжы ў сувязі з чаканым адкрыццём Літвой пунктаў пропуску”.
На ім дзяржсакратар Савета бяспекі Аляксандр Вальфовіч заявіў: “У СМІ з’яўляюцца нейкія паведамленні аб тым, што ўрад Літвы збіраецца адкрыць закрытыя імі ж пункты пропуску”.
“На жаль, ніякіх афіцыйных апавяшчэнняў ні аб закрыцці пунктаў пропуску, ні аб адкрыцці, як гэтага патрабуюць міжнародныя дагаворы, на сённяшні дзень не паступала”, — сказаў ён.
Праца пунктаў пропуску Шальчынінкай (з беларускага боку Беняконі) і Мядзінінкай (Каменны Лог) адновіцца з 00:00 па літоўскай (01:00 па беларускім часе 20 лістапада, вынікае з інфармацыі на сайце ўрада Літвы).
Пры гэтым паведамляецца, што рух праз згаданыя памежныя пункты будзе магчымы “толькі на аўтамабілі”. Такім чынам, верагодна, размова аб аднаўленні аўтобуснага руху на гэтым этапе не вядзецца.
Таксама зазначаецца, што “можа ўводзіцца часовае абмежаванне на перамяшчэнне асоб праз пункты Шальчынінкай і Мядзінінкай, калі будуць дастатковыя падставы меркаваць, што такое перамяшчэнне штучна арганізавана, заахвочваецца або дазваляецца пры ўдзеле суседніх дзяржаў і стварае пагрозу нацыянальным інтарэсам бяспекі Літоўскай Рэспублікі”.
Аб тым, што ўрад Літвы прыняў рашэнне адкрыць мяжу з Беларуссю, стала вядома днём 19 лістапада.
