Паводле метадалогіі МАП у Беларусі ўзровень беспрацоўя вышэйшы, чым у Расіі

11 снежня, Позірк. У ліпені — верасні 2025 года ўзровень беспрацоўя ў Беларусі быў вышэйшы, чым у Расіі, вынікае з праведзенага “Позіркам” аналізу даных Еўразійскай эканамічнай камісіі (ЕЭК).

Адпаведная статыстыка падрыхтавана па метадалогіі Міжнароднай арганізацыі працы (МАП).

У РФ у трэцім квартале 2025 года гэты паказчык складаў 2,1% колькасці рабочай сілы, Беларусі — 2,4%, Казахстане — 4,6%.

Даныя па Арменіі вядомыя за другі квартал 2024 года — 12,3%, па Кыргызстане толькі за 2024 год — 3,7%.

Разам з тым у службах занятасці насельніцтва дзяржаў Еўразійскага эканамічнага саюза на канец кастрычніка 2025 года налічвалася 361,4 тыс. беспрацоўных (на канец верасня — 355,8 тыс.; +1,6%). У Арменіі было зарэгістравана 36,3 тыс. (за месяц паказчык не змяніўся), Беларусі — 3,8 тыс. (4 тыс., -5%), Кыргызстане — 41 тыс. (42,7 тыс.; -4%), Расіі — 280,3 тыс. (272,8 тыс.; +2,7%).

У кастрычніку 2025 года ў беларускай эканоміцы было занята 4 млн 156,6 тыс. чалавек — на 5,5 тыс. больш, чым у верасні (4 млн 151 тыс.; +0,13%), сведчыць праведзены “Позіркам” аналіз даных Нацыянальнага статыстычнага камітэта.