Дзярждэпартамэнт: У 2026 годзе ЗША працягнуць дыпламатычныя намаганні па вызваленні палітвязняў у Беларусі, якія засталіся

Апублікавана на адкрытай версіі “Позірку” 31 снежня 2025 года ў 22:37

31 снежня, Позірк. “Злучаныя Штаты гатовыя да далейшага ўзаемадзеяння з Беларуссю, якое адпавядае інтарэсам ЗША, і будуць працягваць дыпламатычныя намаганні па вызваленні пакінутых палітычных зняволеных у Беларусі“, — заявілі “Позірку“ ў Дзярждэпартаменце ЗША ў адказ на просьбу падвесці вынікі 2025 года і акрэсліць задачы на 2026 год у сферы амерыкана-беларускіх стасункаў.

“Апошняе вызваленне зняволеных (найбольш масавае: 123 чалавекі 13 снежня. — “Позірк“.) мы разглядаем як яшчэ адзін канструктыўны крок да паляпшэння нашых двухбаковых стасункаў з Беларуссю, — гаворыцца ў каментары знешнепалітычнага ведамства ЗША. — Трэба будзе яшчэ многае зрабіць, і мы спадзяемся на далейшы прагрэс“.

“Мы працягнем вывучаць магчымасці для прагматычнага ўзаемадзеяння з Беларуссю там, дзе гэта адпавядае інтарэсам Злучаных Штатаў“, — паведаміў Дзярждэпартамент.

На 31 снежня ў Беларусі ад 1.131 (даныя праваабарончага цэнтра “Вясна“) да 1.182 (ініцыятыва Dissidentby) палітвязняў.

Гл. таксама:

Спецдакладчык ААН перасцярог ад празмернага аптымізму адносна сітуацыі з правамі чалавека ў Беларусі

Літоўскі дэпутат Павілёніс: Трэба даводзіць да ЗША, што здзелкі з беларускім рэжымам — глупства