BelPol: У Беларусі няма комплексу “Арэшнік”, відэа Мінабароны пра яго размяшчэнне — пастановачнае
"Рытуал заступлення" на баявое дзяжурства ў Беларусі комплексу “Арэшнік”
11 студзеня, Позірк. У Беларусь не завезены з РФ ракетны комплекс “Арэшнік”, заявы Аляксандра Лукашэнкі і яго атачэння з ліку сілавікоў аб пастаноўцы расійскага ўзбраення на баявое дзяжурства носяць прапагандысцкі характар. Пра гэта гаворыцца ў відэа аб’яднання BelPol, апублікаваным 11 студзеня на платформе “Ютуб” пад загалоўкам “Чаму “Арэшнік” — самая вялікая хлусня Лукашэнкі”.
Сярод іншага аўтары звяртаюць увагу на 35-секундны відэаролік, апублікаваны 30 снежня 2025 года Міністэрствам абароны. Ведамства сцвярджала, што на паказаных кадрах — “рытуал заступлення на баявое дзяжурства рухомага грунтавога ракетнага комплексу “Арэшнік”, дастаўленага ў Беларусь. Паводле звестак BelPol, гэта відэа — пастановачнае.
Аб’яднанне падкрэслівае, што такая інфармацыя атрыманая ім ад некалькіх незвязаных паміж сабой крыніц у Мінабароны.
“Няма абсалютна ніякіх доказаў таго, што відэа не было знятае ў Расійскай Федэрацыі”, — гаворыцца ў расследаванні арганізацыі.
Адзначаецца, што ў відэа Мінабароны “глядач убачыў усяго толькі тры машыны на маршы” — “машыну баявога ахоўвання, машыну забеспячэння баявога дзяжурства і, верагодна, камандны пункт дывізіёна”. Пры гэтым не паказаныя “ключавыя элементы” “Арэшніка”, у тым ліку мабільныя пускавыя ўстаноўкі.
BelPol звяртае ўвагу, што ў склад “Арэшніка” ўваходзіць мноства рабочай і ахоўнай тэхнікі, а таксама тэхнікі для абслугоўвання комплексу. У выніку, паводле ацэнак экспертаў, даўжыня перасоўнай калоны комплексу павінна складаць 400–650 метраў. Не заўважыць такую колькасць вайсковай тэхнікі з дапамогай спадарожнікавых здымкаў і іншых сродкаў выведкі немагчыма, мяркуе BelPol, — “асабліва пасля гучнай заявы аб наяўнасці “Арэшніка” на тэрыторыі Рэспублікі Беларусь”.
BelPol падкрэслівае, што для функцыянавання “Арэшніка” ў Беларусі павінна быць створаная асобная вайсковая структура — са штабам палка, стацыянарным вузлом сувязі і вышкай сувязі, карпусамі для пражывання і абслугоўвання асабістага складу, гаражамі і інш. “Схаваць будаўніцтва аб’екта такога кшталту вельмі цяжка”, — заяўляюць аўтары.
Нерэальна, на думку расследвальнікаў, таксама пабудаваць такія аб’екты за адзін год, які прайшоў пасля першай заявы Лукашэнкі аб жаданні размясціць у Беларусі “Арэшнік”.
Акрамя таго, гэта затратна, бо кошт адной мабільнай ўстаноўкі можа перавышаць 100 млн долараў, а цана ўсяго комплексу складзе арыентыровачна 1–2 млрд долараў. Пры гэтым гатоўнасць РФ узяць на сябе фінансаванне BelPol ацэньвае скептычна, таму што, паводле інфармацыі аб’яднання, расійскі бок і без таго мае праблемы з разлікамі па вайсковых заказах у Беларусі.
Гл. таксама:
“Арэшнік” можа быць разгорнуты ў “лічаныя хвіліны”, але гэта “досыць інтымнае пытанне” — Муравейка
