У 2025 годзе найбольш падаражэлі какава-парашок, кава і курсы кіроўцаў
14 студзеня, Позірк. Какава-парашок, натуральная молатая кава і курсы кіроўцаў найбольш падаражэлі ў Беларусі ў 2025 годзе (без уліку сезоннай плодаагародніннай прадукцыі), сведчыць праведзены “Позіркам“ аналіз даных Белстата.
Цэны на какава-парашок павялічыліся на 72,72%, каву — на 36,05%, курсы кіроўцаў сталі даражэй на 35,36% пры агульным росце спажывецкіх цэн на 6,83%.
У першую пяцёрку па падаражэнні сярод несезонных харчовых тавараў акрамя вышэйназваных увайшлі салёны селядзец (+26,39%), растваральны какава-напой (+25,14%) і мёд (+24,41%). Патаннелі толькі рыс (-13,62%) і аліўкавы алей (-5,12%).
Цэны на нехарчовыя тавары павысіліся ў сярэднім на 3,03%. У лідарах — глебагрунт (+18,58%), штотыднёвыя газеты (+17,84%), штодзённыя газеты (+16,78%), лак для пазногцяў (+16,63%) і губная памада (16,37%).
У 2025 годзе ўлады планавалі ўтрымаць інфляцыю ў межах 5%. Такім чынам, па выніках года парог перавышаны на 1,83 адсоткавага пункта, або ў 1,37 раза.
Больш статыстыкі даступна падпісчыкам “Позірк+” (калі спасылка не працуе, карыстайцеся, калі ласка, гэтай)
