27 студзеня, Позірк. Закон, які ратыфікуе пагадненне паміж урадамі Беларусі і Амана аб узаемным скасаванні віз, падпісаў 27 студзеня Аляксандр Лукашэнка, паведамляе неафіцыйны тэлеграм-канал прэс-службы палітыка.
Як адзначаў “Позірк”, дакумент вызначае, што беларусы могуць заязджаць у Аман, а аманцы — у Беларусь на падставе нацыянальных пашпартоў на тэрмін да 30 дзён з даты перасячэння мяжы. Пры гэтым агульны тэрмін бязвізавага знаходжання не павінен перавышаць 90 дзён у годзе.
Палата прадстаўнікоў прыняла закон, які ратыфікуе гэтае пагадненне, 13 студзеня, Савет Рэспублікі ўхваліў яго 21 студзеня.
Аманскі бок ратыфікаваў дакумент 12 лістапада 2025 года.
Пагадненне заключанае 6 кастрычніка 2025 года ў Мінску ў прысутнасці Лукашэнкі і султана Амана Хайсама бін Тарыка аль Саіда. Дакумент падпісалі міністр замежных спраў Максім Рыжанкоў і яго аманскі калега Бадр бін Хамад бін Хамуд аль Бусаідзі.
“Дзякуючы сумесна прынятым рашэнням пра аблягчэнне візавых патрабаванняў і запуск прамых авіязносін з лютага 2025 года ўжо звыш 1,7 тысячы беларусаў наведалі вашу цудоўную краіну, разлічваем на сустрэчны паток аманскіх гасцей”, — заявіў тады Лукашэнка.
Лукашэнка наведваў Аман напрыканцы лістапада — на пачатку снежня мінулага года. Яго прэс-служба анансавала сустрэчу з султанам, але пасля не паведаміла, ці адбылася яна.
Папярэдні раз палітык знаходзіўся ў Амане з працоўным візітам у снежні 2024 года. Тады на сустрэчы з султанам ён абмеркаваў “стан і перспектывы развіцця стасункаў”. Лукашэнка заявіў, што Мінск і Маскат створаць “міжўрадавую камісію або камітэт” і выпрацуюць дарожную карту па двухбаковай супрацы.
14 снежня 2024 года паведамлялася, што для грамадзян Беларусі пачала дзейнічаць працэдура спрошчанага ўезду ў Аман. Без візы ў краіне можна было знаходзіцца не больш за 14 дзён. Тады ж стала вядома, што паміж Беларуссю і Аманам будуць наладжаныя прамыя авіязносіны. 1 кастрычніка 2025-га Лукашэнка сваім указам ухваліў праект пагаднення з Аманам аб узаемным скасаванні віз.
19 траўня 2025 года Лукашэнка, прымаючы ў Мінску спадкаемнага прынца, міністра культуры, моладзі і спорту Амана Зеязіна бін Хайсама аль Саіда, заявіў, што Беларусь сярод іншага зацікаўленая ў партовай інфраструктуры гэтай дзяржавы.
Летась 16 чэрвеня Рыжанкоў і аль Бусаідзі па тэлефоне абмеркавалі “шырокае кола пытанняў” двухбаковага ўзаемадзеяння, а таксама міжнароднага і рэгіянальнага парадку дня.
