27 студзеня, Позірк. Аэрапорт Вільнюса аднавіў працу ў 20:24 паводле мясцовага часу (21:24 паводле Мінску) — праз 1 гадзіну 19 хвілін пасля ўвядзення абмежавання на палёты праз “гібрыдную атаку супраць Літвы, грамадзянскай авіяцыі і грамадства” з боку Беларусі, вынікае з паведамлення транспартнага вузла.
Такім чынам, абмежаванні былі знятыя на 1 гадзіну 41 хвіліну раней, чым першапачаткова планавалася.
Аэрапорт папярэдзіў, што 27–28 студзеня магчымыя “асобныя затрымкі рэйсаў” з прычыны “парушэнняў у ратацыі экіпажаў і паветраных суднаў”.
Як паведамляў “Позірк”, 27 студзеня — упершыню з 6 снежня 2025 года — аэрапорт быў закрыты праз тое, што ў “зонах, небяспечных для авіяцыі”, зноў былі зафіксаваныя “навігацыйныя знакі, характэрныя для паветраных шароў”.
Уварванне паветраных шароў з кантрабанднымі цыгарэтамі з Беларусі ў Літву ўвосені і ў на пачатку снежня 2025 года стала прычынай неаднаразовага закрыцця Вільнюскага аэрапорта, што месціцца непадалёк ад мяжы. Акрамя таго, з 29 кастрычніка па 19 лістапада Літва закрывала мяжу з Беларуссю.
Летась 9 снежня урад Літвы абвясціў экстрэмальную сітуацыю дзяржаўнага ўзроўню праз “гібрыдную атаку Беларусі”. Рашэнне было прынятае “ў сувязі з пагрозай нацыянальнай бяспецы дзяржавы і небяспекай для жыцця і здароўя людзей, а таксама для маёмасці і (або) навакольнага асяроддзя, якое ствараецца тым, што на тэрыторыю Літвы з Беларусі запускаюцца паветраныя шары, якія перавозяць кантрабанду”.
Спецыяльны пасланнік прэзідэнта ЗША Дональда Трампа па Беларусі Джон Коўл пасля вяртання ў Вільнюс з Мінска, дзе 12 і 13 снежня праводзіў перагаворы з Аляксандрам Лукашэнкам, заявіў, што апошні паабяцаў яму садзейнічаць у спыненні палётаў метэазондаў з Беларусі ў Літву.
