Ад пачатку лютага ў Беларусь заляцела мінімум тры расійскія баявыя дроны — “Флагшток”

11 лютага, Позірк. Ад пачатку лютага зафіксавана сама меней тры выпадкі, калі на тэрыторыю Беларусі заляталі расійскія баявыя беспілотнікі, паведамляе рэгіянальнае медыя “Флагшток” са спасылкай на ўкраінскія маніторынгавыя каналы “Рында маніторыт” і “еРадар”.

Апошні выпадак адбыўся раніцай 7 лютага, калі “адзін дрон вылецеў у Гомельскую вобласць праз Чарнобыль”, а пазней БПЛА “ляцеў курсам на Чарнобыль з Беларусі”. Верагодна, гэта быў адзін і той жа беспілотнік.

Уначы 6 лютага расійскі дрон рухаўся з Беларусі ў бок Оўруча (Жытомірская вобласць Украіны). Пра месца і час залёту дрона ў беларускую паветраную прастору не паведамлялася.

Удзень 5 лютага пара беспілотнікаў “залятала ў Беларусь, каб уздоўж мяжы накіравацца на Кіеўшчыну або Жытоміршчыну”; пра тое, што з імі было далей, невядома.

У студзені было зафіксавана восем выпадкаў, калі расійскія дроны заляталі на тэрыторыю Беларусі.

У снежні 2025 года не было ніводнага пацверджанага факта перасячэння беларускай мяжы, у лістападзе — чатыры, паведамляе выданне.

На сустрэчы са старшынёй Дзяржаўнага пагранічнага камітэта Канстанцінам Маластавым ды іншымі сілавікамі 12 студзеня ў Мінску Аляксандр Лукашэнка прызнаў, што сістэма абароны прапускае чужыя беспілотнікі.

“Адзінае акно на ўсходзе з Расійскай Федэрацыяй, дзе ў нас крыху лягчэй, — сказаў ён. — Але я б не сказаў, асабліва ў сувязі з апошнімі падзеямі ва Украіне, калі невядома адкуль і незразумела адкуль могуць заляцець на тваю тэрыторыю беспілотнікі. Скажам шчыра, і мы не навучыліся яшчэ на 100% рэагаваць на гэтыя ўсе залёты і не навучыліся іх на 100% знішчаць. Не ведаю, ці магчымыя гэтыя 100%. Але да гэтага трэба нам імкнуцца”.

Напрыканцы ліпеня 2025 года партал “Люстэрка” са спасылкай на відавочцаў паведаміў, што каля 2:00 дрон урэзаўся ў шматпавярховы дом у Фрунзенскім раёне сталіцы, упаў на прыпаркаваны аўтамабіль і выбухнуў. Прыкладна праз гадзіну пасля з’яўлення інфармацыі ў медыя Міністэрства абароны прызнала факт падзення беспілотніка.

Пазней Следчы камітэт паведаміў, што беспілотнік, які ўпаў, быў начынены тратылам і вялікай колькасцю паражальных элементаў, узбуджаная крымінальная справа. СК пацвердзіў, што рэшткі беспілотніка пашкодзілі некалькі прыпаркаваных аўтамабіляў і прызямліліся на прылеглую да дома тэрыторыю.

На пачатку жніўня таго ж года рэгіянальнае выданне “Флагшток” паведаміла, што жыхароў дамоў у прыватным сектары ў Рэчыцы (Гомельская вобласць) эвакуявалі праз беспілотнік, які ўпаў.