13 лютага, Позірк. Пра падпісанне прэм’ер-міністрам Аляксандрам Турчынам пастановы аб адкрыцці амбасады Беларусі ў Амане 13 лютага паведаміла прэс-служба Савета міністраў.
На думку ўрада, пастаянная дыпламатычная прысутнасць Беларусі ў Амане дазволіць “істотна павысіць эфектыўнасць работы па развіцці палітычных, гандлёва-эканамічных і інвестыцыйных сувязяў, практычным вывучэнні магчымасцяў прамысловай кааперацыі і сумесным асваенні новых рынкаў; умацаваць пазіцыі Беларусі на аманскім напрамку, а таксама знайсці новыя выхады на краіны Афрыкі і Емен”.
Меркаваныя тэрміны адкрыцця амбасады ў Маскаце ўрад не паведаміў. Магчыма, яны ўказаныя ў тэксце пастановы, які будзе апублікаваны пазней.
За два дні да падпісання пастановы амбасадар Беларусі ў Егіпеце Яўген Сабалеўскі ўручыў даверчыя граматы султану Амана Хайсам бін Тарыку аль Саіду ў якасці амбасадара ў Амане па сумяшчальніцтве.
Тады адзначалася, што бакі абмеркавалі “графік двухбаковых мерапрыемстваў на бліжэйшую перспектыву, уключаючы правядзенне першага пасяджэння сумеснага камітэта па супрацоўніцтве і інвестыцыях”. Міжурадавае пагадненне аб стварэнні гэтага камітэта было падпісана 19 траўня 2025 года.
Аляксандр Лукашэнка апошні раз наведваў Аман напрыканцы лістапада — напачатку снежня 2025 года (да і пасля візіту ў Алжыр).
27 студзеня 2026 года палітык падпісаў закон, які ратыфікуе пагадненне паміж урадамі дзвюх краін аб узаемнай адмене віз.
Як паведамляў “Позірк”, дакумент вызначае, што беларусы могуць уязджаць у Аман, а аманцы — у Беларусь па нацыянальных пашпартах на тэрмін да 30 дзён з даты перасячэння мяжы. Пры гэтым агульны тэрмін бязвізавага знаходжання не павінен перавышаць 90 дзён на год.
Аманскі бок ратыфікаваў дакумент 12 лістапада 2025 года.
