16 лютага, Позірк. За мінулыя выхадныя ў Беларусі патанулі тры чалавекі, паведамляе Рэспубліканскае таварыства ратавання на водах (ТРВОД).
У тэлеграм-канале таварыства паведамляюцца падрабязнасці аднаго з такіх выпадкаў.
Адзначаецца, што днём 15 лютага з ракі Мухавец у Брэсце вынята цела жанчыны 1940 года нараджэння.
“Паводле інфармацыі ад відавочцаў, пажылая жанчына наблізілася да краю прычала пакарміць вадаплаўных птушак і выпусціла ў ваду пакет з кормам. Нагнуўшыся, жанчына страціла раўнавагу і ўпала ў ваду, знаходзілася на адлегласці 0,5 метра ад берага (глыбіня каля 1 метра)”, — удакладняе ТРВОД.
Пенсіянерка была вынятая з вады відавочцам.
“Брыгадай хуткай дапамогі, якая прыбыла, праводзіліся рэанімацыйныя мерапрыемствы, аднак жанчыну выратаваць не ўдалося”, — гаворыцца ў паведамленні.
