Барацьба за грамадзянскія правы ў Беларусі патрабуе далейшай падтрымкі Еўропы — кіраўнік камітэта Бундэстага па замежных справах

17 лютага, Позірк. Вызваленчая барацьба за грамадзянскія правы ў Беларусі патрабуе далейшай падтрымкі Еўропы, заявіў кіраўнік камітэта Бундэстага па замежных справах Армін Лашэт пасля перамоваў з беларускімі дэмакратычным лідарам Святланай Ціханоўскай 16 лютага ў Берліне.

“Лаўрэат ахенскай прэміі імя Карла Вялікага за 2022 год Святлана Ціханоўская наведала Берлін. Добрая размова аб садзейнічанні і надзея на змены па суседстве з Еўропай”, — напісаў Лашэт у Х“.

Як паведаміў “Позірку“ галоўны дарадца дэмлідара Франак Вячорка, Ціханоўская падзякавала Германіі і асобна Лашэту за дапамогу і заявіла пра важнасць далейшай падтрымкі беларускай грамадзянскай супольнасці, незалежных СМІ і культурных праектаў.

Яна праінфармавала суразмоўцу аб працэсе вызвалення палітвязняў і гуманітарным трэку, які вядуць ЗША. Ціханоўская падкрэсліла важнасць захавання Еўропай паслядоўнай і прынцыповай пазіцыі ў дачыненні да Беларусі, каб дамагчыся спынення рэпрэсій і сістэмнага паляпшэння сітуацыі з правамі чалавека.

Дэмлідар нагадала, што за кратамі застаецца больш за 1.150 палітвязняў (на раніцу 17 лютага дакладна 1.150, паводле звестак праваабарончага цэнтра “Вясна“. — “Позірк“.) і неабходна працягваць ціск для вызвалення ўсіх.

Ціханоўская заклікала Германію прымаць больш беларускіх палітвязняў, калі іх будуць выдвараць з краіны пасля вызвалення.

Паводле слоў Вячоркі, бакі абмеркавалі таксама супрацоўніцтва дэмсілаў з Украінай, праблемы, з якімі сутыкаюцца беларусы за мяжой. Ціханоўская адзначыла, што Германія — адзін з лідараў па колькасці віз, якія выдаюцца беларусам, і гэта важна з пункту гледжання захавання мабільнасці, умацавання праеўрапейскіх настрояў і сувязяў паміж беларусамі ўнутры краіны і еўрапейскімі дзяржавамі.

Асобна бакі абмеркавалі дзейнасць групы сяброў дэмакратычнай Беларусі ў Бундэстагу, правядзенне сумесных мерапрыемстваў з удзелам дэпутатаў — сімвалічных хросных беларускіх палітвязняў у рамках праграмы нямецка-швейцарскай праваабарончай арганізацыі Libereco, ініцыятыву правядзення Кангрэса сімвалічных хросных.