Украіна вывучыць “усе схемы Лукашэнкі і яго саўдзельнікаў”, заяўляе Зяленскі
19 лютага, Позірк. Дбайна вывучыць “усе схемы Аляксандра Лукашэнкі і яго саўдзельнікаў” даручыў чыноўнікам прэзідэнт Украіны Уладзімір Зяленскі.
Як вынікае з звароту кіраўніка ўкраінскай дзяржавы, апублікаванага на яго сайце ўвечары 18 лютага, Украіна мае намер супрацьдзейнічаць рэжыму Лукашэнкі “больш адчувальна” і будзе працаваць са сваімі партнёрамі “ў рэгіёне і па ўсёй Еўропе, а таксама з глабальнымі партнёрамі, каб яны цалкам разумелі, з чым маюць справу, калі гаворка ідзе пра рэжым у Беларусі”.
Зяленскі падкрэсліў, што ўвядзеннем санкцый у дачыненні да Лукашэнкі Украіна адказвае “на яўна большае ўцягванне Беларусі ў вайну Расіі супраць Украіны”.
“Лукашэнка прывык гандляваць суверэнітэтам сваёй дзяржавы і здаў шмат інтарэсаў Беларусі, здаў расіянам”, — адзначыў украінскі прэзідэнт.
На думку Зяленскага, “цягам доўгага часу” Лукашэнка “ўсё ж устрымліваўся ад прамых сваіх жорсткіх дзеянняў на карысць Расіі”, але з восені мінулага года Украіна фіксуе на тэрыторыі Беларусі рэтранслятары, якія працуюць на падтрымку расійскіх ударных дронаў.
Украіна “мяняе палітыку” і будзе “адэкватна адказваць” на пагрозы — у Мінску павінны гэта разумець, падкрэсліў палітык.
“Беларусь — краіну, людзей, народ — нельга губляць для Еўропы. Але гэтага чалавека, які ставіць Беларусь на службу Расіі, сапраўды варта “страціць”, — падсумаваў ён.
Раней у той дзень Зяленскі паведаміў пра ўвядзенне санкцый у дачыненні да Лукашэнкі. Прэзідэнт Украіны заявіў, што Кіеў “актывізуе супрацьдзеянне ўсім формам садзейнічання” Лукашэнкі “забойствам украінцаў” і будзе “працаваць з партнёрамі так, каб гэта мела глабальны эфект”.
