З пачатку года падляскія памежнікі выявілі цыгарэт, перапраўленых з Беларусі метэазондамі, амаль на 900 тыс. долараў

23 сакавіка, Позірк. Падчас аператыўных мерапрыемстваў Падляскага атрада памежнай службы (Польшча) у мінулыя выходныя былі выяўленыя кантрабандныя беларускія цыгарэты на суму больш за 470 тысяч злотых (127,8 тыс. долараў ЗША), заявіла прэс-служба атрада 23 сакавіка.

Паведамляецца аб затрыманні двух чалавек, якія перавозілі ў аўтамабілі кантрабанду, перапраўленую з Беларусі ў Польшчу з дапамогай метэаралагічных зондаў. Яе выявілі супрацоўнікі пагранзастаў у Ліпску і Крынках. На месцы здарэння таксама былі знойдзеныя рэшткі метэазондаў і GPS-перадатчыкі.

Агулам канфіскавана больш за 20 тыс. пачкаў цыгарэт розных марак ацэначным коштам каля 420 тыс. злотых (больш за 114 тыс. долараў).

“Цяпер высвятляюцца асобы, якія маюць дачыненне да адпраўкі і атрымання незаконных грузаў”, — паведамілі памежнікі.

Акрамя таго, памежнікі ў Кузніцы падчас праверкі аўтамабіля маркі “Форд” выявілі ў багажніку тытунёвыя вырабы без польскіх акцызных марак — 2,5 тыс. пачкаў цыгарэт ацэначным коштам больш за 51 тыс. злотых (13,8 тыс. долараў), а таксама два GPS-перадатчыкі. У аўтамабілі знаходзілася двое грамадзян Польшчы.

Затрыманым пагражае не менш за 3 гады пазбаўлення волі. Кіроўца рашэннем суда арыштаваны на 3 месяцы.

З пачатку гэтага года Падляскі атрад памежнай службы выявіў кантрабанду, перапраўленую з Беларусі ў Польшчу з дапамогай метэазондаў, на агульную суму больш за 3,3 млн злотых (897,7 тыс. долараў).

Пра затрыманне кантрабанды цыгарэт з Беларусі паведамляюць як польскія, так і літоўскія памежнікі.

З 1 студзеня па 12 сакавіка 2026 года літоўскія памежнікі перахапілі 57 партый нелегальных цыгарэт, дастаўленых з Беларусі з дапамогай паветраных шароў, паведамляла Служба аховы дзяржаўнай мяжы (САДМ) Літвы.

Паводле інфармацыі ведамства, у студзені мінулага года было перахоплена 63 партыі (у тым жа месяцы 2026-га — 29), у лютым — 45 (24), за ўвесь сакавік — 77 (за 12 дзён — 4).

Летась было перахоплена ў агульнай складанасці 635 партый цыгарэт, дастаўленых паветранымі шарамі з Беларусі ў Літву. У 2024 годзе такіх выпадкаў было 226. У 2022 годзе выпадкаў кантрабанды паветранымі шарамі не было, у 2023-м — зафіксавана тры такія спробы.

Уварванне паветраных шароў з кантрабанднымі цыгарэтамі з Беларусі ў Літву восенню і ў пачатку снежня 2025 года стала прычынай неаднаразовага закрыцця Вільнюскага аэрапорта, размешчанага недалёка ад мяжы. У спробе прымусіць Мінск паўплываць на сітуацыю Літва з 29 кастрычніка па 19 лістапада закрывала мяжу з Беларуссю.

20 сакавіка Аляксандр Лукашэнка паведаміў, што супрацоўнікі Міністэрства ўнутраных спраў затрымалі “зламыснікаў, якія займаліся незаконнай дастаўкай цыгарэт за мяжу“. Паводле яго сцвярджэння, на тэрыторыі Літвы “знаходзяцца тыя, хто гэтыя незаконныя грузы прымае“: “Акрамя таго, у перакідцы тавараў з беларускай тэрыторыі задзейнічаныя і самі літоўцы“.