У Лоеўскім раёне ўпаў дрон — СМІ
26 сакавіка, Позірк. Паблізу мяжы з Украінай у адной з вёсак Лоеўскага раёна (Гомельская вобласць) 24 сакавіка “расійскі дрон упаў на агарод мясцовага жыхара, але не выбухнуў”, паведамляе рэгіянальнае медыя “Флагшток”.
Паводле звестак выдання, беспілотнік “вывезлі спецыяльныя службы”.
Раней “Флагшток” паведамляў, што 24 сакавіка пры масіраваным удары Расіі па Украіне некалькі БПЛА заляталі ў Гомельскую вобласць. Адзін з іх праляцеў праз тэрыторыю Брагінскага раёна ў раёне вёскі верхнія Жары, другі “зрэзаў шлях” па тэрыторыі Добрушскага раёна (прыкладная траекторыя: Кузьмінічы — Усохская Буда).
Сцвярджаецца, што ў гэты дзень мяжу патруляваў беларускі самалёт Су-30.
Ноччу 23 сакавіка жыхары Магілёва, Мінска і раёна, а пазней Гродна паведамлялі аб гуках, падобных на дрон, які ляціць над дамамі. Афіцыйных каментарыяў ад уладаў не паступала. У 4:04 па мінскім часе камера відэаназірання зафіксавала выбух дрона на лёдзе возера ў Варэнскім раёне Літвы, які мяжуе з Гродзенскай вобласцю.
20 лютага 2026 года камандуючы ВПС і войскамі СПА Андрэй Лук’яновіч заявіў, што беларускія вайскоўцы рэгулярна ўжываюць авіяцыю і зенітныя ракетныя комплексы для знішчэння беспілотнікаў, якія залятаюць у Беларусь.
За 2025 год у Беларусі размініравана каля 520 дронаў, кожны трэці — баявы, заявіў 18 сакавіка ў інтэрв’ю прэс-службе ўнутраных войскаў (УВ) МУС намеснік міністра ўнутраных спраў — камандуючы ВВ Мікалай Карпянкоў. Пра паходжанне дронаў ён не паведаміў.
Афіцыйны Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны.
