Метэазонд з беларускімі цыгарэтамі прызямліўся ў двары дома ў Літве

26 сакавіка, Позірк. У ноч на 26 сакавіка ў двары жыхара горада Жэжмарай (Кайшадорскі раён Каўнаскага павета Літвы) прызямліўся паветраны шар з кантрабанднымі беларускімі цыгарэтамі, паведамляе LRT.

Адзначаецца, што пра здарэнне паліцыю апавясціў гаспадар дома. Паліцэйскія, якія прыбылі на месца, выявілі 1.500 пачкаў цыгарэт і GPS-прыладу.

З 1 студзеня па 12 сакавіка 2026 года літоўскія памежнікі перахапілі 57 партый нелегальных цыгарэт, дастаўленых з Беларусі з дапамогай паветраных шароў, паведамляла раней Служба аховы дзяржаўнай мяжы Літвы (САДМ).

Паводле інфармацыі ведамства, у студзені мінулага года былі перахопленыя 63 партыі (у тым жа месяцы 2026-га — 29), у лютым — 45 (24), за ўвесь сакавік — 77 (за 12 дзён — 4).

Аб зніжэнні інтэнсіўнасці паветранай кантрабанды цыгарэт з Беларусі САДМ заяўляла 13 лютага.

У 2025 годзе літоўскія памежнікі затрымалі 171 чалавека, меркавана звязанага са згаданым спосабам нелегальнай дастаўкі цыгарэт.

Летась было перахоплена ў агульнай складанасці 635 партый цыгарэт, дастаўленых паветранымі шарамі з Беларусі ў Літву. У 2024 годзе такіх выпадкаў было 226. У 2022 годзе выпадкаў кантрабанды паветранымі шарамі не было, у 2023-м — зафіксаваныя тры такія спробы.