Прэм’ер Літвы: Мы не абмяркоўвалі з Коўлам транзіт беларускіх угнаенняў, для гэтага няма ўмоў праз санкцыі ЕС

27 сакавіка, Позірк. Вільнюс “можа разгледзець” магчымасць дыялогу з Мінскам на ўзроўні намеснікаў міністраў замежных спраў пры выкананні шэрагу ўмоў, заявіла прэм’ер-міністр Літвы Інга Ругінене.

Як паведамляе LRT са спасылкай на кіраўніка ўрада, гэтымі ўмовамі з’яўляюцца: спыненне кантрабанды цыгарэт з дапамогай метэазондаў; вяртанне ў краіну грузавікоў літоўскіх перавозчыкаў “без якіх-небудзь дадатковых збораў або штрафаў”; спыненне міграцыйнага крызісу на мяжы.

Пры гэтым, як заявіла Ругінене, яна “ніколі ні на якім узроўні” не абмяркоўвала са спецпасланнікам прэзідэнта ЗША Джонам Коўлам транзіт з Беларусі ўгнаенняў — для гэтага “няма ўмоў”, бо ў дачыненні да беларускага калію дзейнічаюць санкцыі ЕС.

Перавозка ўгнаенняў праз літоўскую тэрыторыю магчымая толькі пасля прыняцця адпаведнага рашэння “ўсім блокам Еўрасаюза”, дадала палітык.

Магчымыя кантакты з Мінскам літоўскі прэм’ер назвала “сустрэчай тэхнічнага характару”.

Ругінене падкрэсліла, што хоць метэазонды з цыгарэтамі сталі радзей залятаць у краіну, гэта адбылося шмат у чым “праз актыўную барацьбу Літвы з кантрабандай”. Яна звярнула ўвагу, што аэрапорт у Вільнюсе рэгулярна прыпыняе працу праз паветраныя шары, і назвала кантрабанду такім шляхам “мэтанакіраванай гібрыднай атакай”.

Таксама прэм’ер канстатавала, што затрыманыя ў Беларусі фуры вяртаюцца ў Літву, але з перавозчыкаў беларускі бок “патрабуе аплаты за паркоўку на стаянках”.

Пра неабходнасць дыялогу Вільнюса і Мінска на ўзроўні намеснікаў кіраўнікоў МЗС Коўл заявіў раней інтэрв’ю LRT. Таксама, паводле яго слоў, варта “адкрыць гандаль паміж дзвюма краінамі, адкрыць гандаль з Еўропай і Злучанымі Штатамі”. “Напрыклад, калійныя ўгнаенні з Беларусі павінны пастаўляцца праз Літву, і такім чынам ім адкрыецца шлях у Еўропу — аж да ЗША”, — адзначыў Коўл.

Раней паведамлялася, што Коўл падчас сустрэчы з прэзідэнтам Літвы Гітанасам Наўседам 18 сакавіка падняў пытанне аб магчымасці аднаўлення палітычнага дыялогу паміж Вільнюсам і Мінскам.

“Мой адказ быў вельмі ясны, бо мы добра ведаем гэтага суседа і канкрэтна гэтага дыктатара. Мой пасыл спадару Коўлу заключаўся ў тым, каб вельмі асцярожна трактаваць любыя крокі беларускіх уладаў, паколькі яны па сваёй прыродзе і з-за ідэнтыфікацыі з Расіяй практычна неаддзельныя ад расійскай дзяржавы”, — сказаў Наўседа.

На яго думку, Беларусь можа паспрабаваць раскалоць адзінства краін НАТО і дамагчыся разыходжанняў у палітыцы ЗША і Еўрасаюза ў дачыненні да Мінска.

“Мы нагадалі амерыканскім калегам, што рэжым санкцый ЕС у дачыненні да Беларусі застаецца ў сіле, ён падоўжаны на 12 месяцаў, і, прынамсі ў гэты перыяд, няма ніякіх прававых ці іншых падстаў казаць аб адмене або змякчэнні санкцый, — падкрэсліў Наўседа. — Аналагічнай пазіцыі, паводле маіх даных, прытрымліваюцца і суседнія з Літвой дзяржавы, якія разглядаюцца як альтэрнатыўныя лагістычныя каналы для беларускіх угнаенняў”.

Нягледзячы на рашэнне ЗША аб зняцці санкцый з “Беларуськалія” пазіцыя афіцыйнага Вільнюса па гэтым пытанні застаецца ранейшай, заявіў 19 сакавіка дарадца літоўскага прэм’ер-міністра Ігнас Дабравольскас.

Ён падкрэсліў, што “рашэнні ЗША — гэта пытанне іх нацыянальнай палітыкі”. “Пазіцыя Літвы ў санкцыях супраць Беларусі не мяняецца — мы прытрымліваемся прынцыповага падыходу і выступаем за жорсткі санкцыйны рэжым”, — сказаў Дабравольскас.

Падчас візіту ў Вільнюс 18 сакавіка Коўл правёў шэраг сустрэч з літоўскімі палітыкамі, у тым ліку з прэм’ер-міністрам Інгай Ругінене.

19 сакавіка па выніках яго чарговых перамоваў у Мінску Аляксандр Лукашэнка памілаваў 250 палітвязняў. 235 ён дазволіў застацца на радзіме, 15 было вывезена ў Літву (некаторыя пасля адправіліся ў Польшчу).

26 сакавіка Упраўленне па кантролі за замежнымі актывамі Міністэрства фінансаў ЗША (OFAC) афіцыйна зняло абмежаванні з “Беларуськалія” і Беларускай калійнай кампаніі (БКК). Акрамя таго, знятыя санкцыі з украінскага “Аграсквіта” (Кіеў), даччынага прадпрыемства БКК.

У прэс-рэлізе OFAC адзначаецца, што ў адпаведнасці з генеральнай ліцэнзіяй № 14 дазволеныя аперацыі з удзелам “Белінвестбанка”, “Белінвест-інжынірынгу”, “Белбізнеслізінгу” (звязаны з калійным сектарам), а таксама арганізацыямі, у якіх яны маюць долю мінімум 50%.