За няпоўны тыдзень беларускім бязвізам скарысталася 4,4 тыс. еўрапейцаў

27 красавіка, Позірк. З 22 па 27 красавіка ў бязвізавым парадку ў Беларусь уехала 4.423 жыхары еўрапейскіх краін (з 13 па 22 красавіка — 5.036), сведчыць праведзены “Позіркам” аналіз даных Дзяржаўнага пагранічнага камітэта.

За названы перыяд прыбыў 1.771 грамадзянін Літвы (2.002), 1.279 грамадзян і неграмадзян Латвіі (1.961), 817 грамадзян Польшчы (825), 548 грамадзян іншых еўрапейскіх дзяржаў са спісу пашыранага бязвізу (256).

З сярэдзіны вясны 2022 года Беларусь наведала 1.315.014 жыхароў Еўропы. З Латвіі прыбыло 420.660 замежнікаў, Літвы — 683.313, Польшчы — 143.804. У рамках пашыранага бязвізу для 35 еўрапейскіх дзяржаў з сярэдзіны лета 2024-га ў Беларусь уехала 67.237 чалавек.

Для жыхароў Літвы і Латвіі бязвізавы рэжым дзейнічае з 15 красавіка 2022 года, Польшчы — з 1 ліпеня таго ж года, яшчэ 35 краін Еўропы — з 19 ліпеня 2024-га.

9 снежня 2025 года Аляксандр Лукашэнка падоўжыў бязвізавы ўезд для грамадзян 38 еўрапейскіх краін да 31 снежня 2026 года ўключна.

Пашыраны бязвіз тычыцца жыхароў Андоры, Аўстрыі, Бельгіі, Балгарыі, Босніі і Герцагавіны, Ватыкана, Венгрыі, Вялікабрытаніі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Люксембурга, Ліхтэнштэйна, Мальты, Манака, Нарвегіі, Нідэрландаў, Партугаліі, Паўночнай Македоніі, Румыніі, Сан-Марына, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.

Большасць гэтых краін рэжым Лукашэнкі лічыць “недружалюбнымі” за тое, што ўвялі санкцыі альбо далучыліся да іх.