ЕАБР: Падвышаны попыт на працоўную сілу ў Беларусі фармуе перадумовы для далейшага росту заробкаў

27 красавіка, Позірк. Падвышаны попыт на працоўную сілу ў Беларусі “фармуе перадумовы для далейшага росту заробкаў”, гаворыцца ў штотыднёвым макрааглядзе Еўразійскага банка развіцця (ЕАБР).

Аналітыкі ЕАБР звярнулі ўвагу, што “ўзровень занятасці ў краіне падвысіўся да 68,1% у першым квартале 2026-га ў параўнанні з 67,8% годам раней”. На гэтым фоне, адзначылі яны, “узровень беспрацоўя знізіўся да 2,3%, абнавіўшы гістарычны мінімум”.

У сакавіку намінальны заробак павялічыўся ў гадавым выражэнні на 14,4%, што пры гадавой інфляцыі 5,4% забяспечыла рост рэальных заробкаў на 8,5%.

“Далейшае падвышэнне аплаты працы будзе падтрымліваць пашырэнне ўнутранага попыту, узмацняючы спажывецкую актыўнасць у эканоміцы”, — падкрэслілі эксперты банка.

Прадукцыйнасць працы па валавым унутраным прадукце знізілася ў студзені — лютым 2026 года на 1,4%, у той час як за аналагічны перыяд 2025-га быў рост на 3,3%, паказаў раней праведзены “Позіркам” аналіз даных Нацыянальнага статыстычнага камітэта.

Негатыўная дынаміка па валавым рэгіянальным прадукце адзначаная ва ўсіх абласцях і сталіцы:

• Брэсцкая вобласць — з +3,9% (па выніках двух месяцаў 2025-га) да +1% (па выніках двух месяцаў 2026-га);
• Віцебская — з +0,4% да -1,7% адпаведна;
• Гомельская — з +3,7% да -0,6%;
• Гродзенская — з -2% да -2,1%;
• Мінская — з +5,6% да -3,2%;
• Магілёўская — з +3% да -1,3%;
• Мінск — з +5,7% да -1,2%.

У 2025 годзе прадукцыйнасць працы павялічылася на 1%, рэальны заробак — на 9%, заявіў Аляксандр Лукашэнка 17 лютага, заслухоўваючы справаздачу ўрада за мінулы год.

“Больш за тое, гэтая тэндэнцыя цягнецца не першы год. Якая цана такому дабрабыту, які мы выпінаем як вялікае дасягненне?” — задаў ён рытарычнае пытанне.

З аднаго боку, адзначыў аратар, Савет міністраў запэўнівае, што праз заробак атрымліваецца ўтрымліваць патрэбныя кадры, а з іншага — паводле прадукцыйнасці працы Беларусь “у 2–3 разы” адстае ад “развітых краін”.

“Дык, можа, трэба павялічваць аддачу? Калі кадры трымаеце, кадры павінны ўпірацца і працаваць. І не ў пасрэдніцкіх структурах, а на вытворчасці”, — падкрэсліў ён.

Палітык запатрабаваў збалансаваць “усе патокі ў эканоміцы”, каб пасля давялося “гераічна выпраўляць памылкі або, горш за тое, пакінуць іх будучым кіраванцам”.