Латушка: Трэба вярнуць Беларусі бяз’ядзерны і нейтральны статус

26 красавіка, Позірк. У Канстытуцыю Беларусі трэба вярнуць бяз’ядзерны і нейтральны статус краіны, заявіў намеснік кіраўніцы Аб’яднанага пераходнага кабінета, кіраўнік Народнага антыкрызіснага ўпраўлення Павел Латушка на акцыі “Чарнобыльскі шлях-2026” у Варшаве 26 красавіка.

Паводле яго слоў, гэта неабходна зрабіць, каб спыніць падтрымку расійскай агрэсіі супраць Украіны і вайны супраць Еўропы. “І за гэта мы будзем змагацца: і Аб’яднаны пераходны кабінет, і, спадзяюся, пераабраная Каардынацыйная рада”, — падкрэсліў Латушка.

Ён узгадаў, як падчас працы амбасадарам у Францыі прапанаваў “ураду Лукашэнкі”, каб за будаўніцтвам атамнай электрастанцыі ля Астраўца назірала французская інжынірынгавая кампанія Alstom, “каб былі выкананыя ўсе стандарты бяспекі”. “Мой калега ў Лондане прапаноўваў брытанскую кампанію. Але ўрад Лукашэнкі адмовіўся, ён вырашыў узяць паслугі ад Расійскай Федэрацыі. І мы да гэтай пары не ведаем, наколькі бяспечная астравецкая электрастанцыя”, — адзначыў Латушка.

Прадстаўнік АПК абвінаваціў Лукашэнку ў тым, што з-за яго палітыкі па вяртанні ядзернай зброі ў Беларусь Францыя і Польшча на вучэннях будуць адпрацоўваць ядзерныя ўдары па цэлях не толькі ў Расіі, але і ў Беларусі. Лукашэнка, паводле выразу Латушкі, намаляваў мішэнь з ядзерным элементам на галавах беларусаў.

Пункт аб бяз’ядзерным і нейтральным статусе Беларусі быў выключаны з новай рэдакцыі Канстытуцыі пасля рэферэндуму ў лютым 2022 года.