6 траўня, Позірк. “Экстрэмісцкімі матэрыяламі” прызнаны змест старонкі ў сацыяльнай сетцы “Фэйсбук” памерлага ў зняволенні мастака Алеся Пушкіна, вынікае з апублікаванага 6 траўня Міністэрствам інфармацыі папаўнення ў адпаведны спіс.
Рашэнне прынята судом Глускага раёна (Магілёўская вобласць) 4 траўня. На старонку падпісана 4,8 тыс. чалавек.
Пушкін трапіў у няволю праз палітычна матываваную крымінальную справу.
Мастак шмат гадоў актыўна ўдзельнічаў у руху нацыянальнага адраджэння, рэстаўраваў гістарычныя будынкі і распісваў цэрквы, шмат разоў затрымліваўся па палітычных матывах.
Так, у ліпені 1999 года, на пяцігоддзе праўлення Аляксандра Лукашэнкі, мастак правёў перфоманс каля Адміністрацыі прэзідэнта. Ён прывёз да будынка на вуліцы Карла Маркса тачку, поўную гною, перакуліў яе на маставую, зверху паклаў партрэт Лукашэнкі і праткнуў яго віламі. За гэтую акцыю мастак быў прысуджаны да двух гадоў пазбаўлення волі ўмоўна.
Вясной 2021 года Пушкін у Кіеве на выставе Беларускага пратэстнага мастацтва “Кожны дзень“ узнавіў свой перфоманс “Гной для прэзідэнта“. Пры гэтым на партрэце Лукашэнкі ён разліў чырвоную фарбу, якая сімвалізавала кроў. Гэта ў далейшым стала падставай для крымінальнай справы паводле арт. 370 Крымінальнага кодэкса (здзек над дзяржаўнымі сімваламі).
Кіеўская выстава стала для Пушкіна апошняй прыжыццёвай.
Быў затрыманы праз пяць дзён пасля выступу ў сталіцы Украіны, па вяртанні ў Беларусь. Пушкіну прад’явілі абвінавачванне паводле арт. 130 (распальванне расавай, нацыянальнай, рэлігійнай альбо іншай сацыяльнай варожасці або варожасці) — за “здзяйсненне наўмысных дзеянняў, накіраваных на рэабілітацыю і апраўданне нацызму“, а таксама паводле згаданага арт. 370.
Мастаку паставілі ў віну стварэнне партрэта дзеяча антысавецкага руху Яўгена Жыхара, які экспанаваўся ў Гродне. Пракуратура заявіла, што мастак характарызаваў жыхара як “чалавека з беларускага супраціву, змагара з бальшавікамі, чым праслаўляў і ўхваляў ягоныя дзеянні“.
Працэс пачаўся 10 сакавіка 2022 года ў Мінскім гарадскім судзе. На пасяджэнні 25 сакавіка палітвязень парэзаў сабе жывот у знак пратэсту супраць таго, што адбываецца, за што быў змешчаны ў карцэр.
30 сакавіка 2022 года суддзя Алена Шылько прысудзіла Пушкіна да пяці гадоў пазбаўлення волі ў калоніі строгага рэжыму. Працэс быў закрытым.
11 ліпеня 2023 года Пушкін памёр у бальніцы, куды яго са спазненнем прывезлі з гродзенскай турмы № 1, на 58-м годзе жыцця. У мастака была прабадная язва страўніка, развіўся перытаніт, паліорганная недастатковасць.
У жніўні 2022 года стала вядома, што адміністрацыя папраўчай установы № 22 (Івацэвіцкі раён Брэсцкай вобласці, т.зв. “Воўчыя норы“), дзе Пушкін адбываў пакаранне, змясціла яго на пяць месяцаў у памяшканне камернага тыпу.
11 лістапада 2022 года суддзя суда Івацэвіцкага раёна Аляксандр Кірылавіч пастанавіў перавесці мастака на турэмны рэжым тэрмінам на паўтара года. Неўзабаве палітвязня этапавалі ў Гродзенскую турму № 1, дзе ён утрымліваўся да смерці.
