Супольнасць, звязаная з медыярэсурсам Proinfo, прызнаная “экстрэмісцкім фарміраваннем”

18 траўня, Позірк. Звязаная з медыярэсурсам Proinfo “група грамадзян” папоўніла спіс “экстрэмісцкіх фарміраванняў” у адпаведнасці з рашэннем Міністэрства ўнутраных спраў ад 13 траўня, вынікае з абноўленага пераліку на сайце МУС.

Звяртае на сябе ўвагу той факт, што ў пераліку згаданае “фарміраванне” значыцца як “Беларуская асацыяцыя журналістаў”, але сярод “датычных” інтэрнэт-рэсурсаў няма нічога, што б звязвала яго з БАЖ. Сама БАЖ знаходзіцца ў гэтым спісе згодна з рашэннем КДБ ад 28 лютага 2023 года.

МУС мяркуе, што да новага “фарміравання” мае дачыненне Ірына Бурая.

Proinfo, як гаворыцца на гэтым сайце, публікуе “актуальныя і цікавыя навіны Лунінеччыны, апавяданні і нарысы пра лунінчан, інтэрв’ю з цікавымі суразмоўцамі, жыццёвыя гісторыі, разнастайную даведачную інфармацыю і шматлікія іншыя матэрыялы, а таксама навіны Беларусі і свету”.

Цяпер у спісе “экстрэмісцкіх фарміраванняў”, які сумесна вядуць МУС і КДБ, 356 арганізацый (пазіцый у дакуменце больш праз паўторы і дапаўненні).