У 2025 годзе КДК спыніў 100 злачынстваў, звязаных з “фінансаваннем тэрарызму і экстрэмізму” (дапоўнена)
дададзеныя абзацы 6–10
9 чэрвеня, Позірк. Пра спыненне ў 2025 годзе 100 злачынстваў, звязаных з “фінансаваннем тэрарызму і экстрэмізму”, паведаміў 9 чэрвеня ў Мінску старшыня Камітэта дзяржкантролю (КДК) Васіль Герасімаў.
Паводле інфармацыі прэс-службы КДК, чыноўнік прадставіў такія даныя на сумесным пасяджэнні Палаты прадстаўнікоў і Савета Рэспублікі Нацыянальнага сходу.
Падчас выступу ён адзначыў, што летась была “працягнутая праца па процидзеянні фінансаванню тэрарызму, экстрэмізму, іншай дзейнасці, якая нясе пагрозу нацыянальнай бяспецы краіны”.
“У працэсе супрацьпраўнай дзейнасці зламыснікі выкарыстоўвалі спецыялізаванае праграмнае забеспячэнне, тэхнічныя сродкі, рэсурсы сеткі інтэрнэт, а таксама тэхналогію блокчэйн”, — заявіў кіраўнік КДК.
Падрабязнасцяў спраў, звязаных з “фінансаваннем тэрарызму і экстрэмізму”, Герасімаў не прывёў. Варта адзначыць, што ў апошнія гады ўлады часта выкарыстоўваюць такія фармулёўкі ў кантэксце палітычна матываванага пераследу грамадзян.
Герасімаў таксама паведаміў, што ў 2025 годзе ведамства выявіла 158 злачынстваў карупцыйнай скіраванасці і 71 выпадак неправамернага пасярэдніцтва.
Старшыня КДК заявіў, што за мінулы год камітэт праверыў каля 2,8 тыс. аб’ектаў гандлю і грамадскага харчавання. Калі ў 2025-м прыпынялася дзейнасць 79 такіх аб’ектаў, то ад пачатку 2026-га — больш за 40.
У 2025 годзе, паводле слоў чыноўніка, “выкрыта 195 злачынстваў па фактах ухілення ад выплаты падаткаў, выяўлена звыш 120 злачынстваў па фактах выплаты заробку ў канвертах”. Акрамя таго, задакументаваныя выпадкі выплаты “шэрагу заробку” больш як 11 тыс. работнікам камерцыйных арганізацый.
Пры гэтым, як заявіў кіраўнік ведамства, за апошнія пяць гадоў колькасць усіх відаў кантрольных мерапрыемстваў істотна знізілася: праверак — амаль удвая, маніторынгаў — у 5,5 раза, “мерапрыемстваў тэхнічнага характару” — амаль утрая. Дакладных лічбаў чыноўнік не прывёў.
У сакавіку паведамлялася, што КДК прыцягнуў да дысцыплінарнай і адміністрацыйнай адказнасці ў 2025 годзе за парушэнне правілаў гандлю каля 700 чалавек.
