СК абвінаваціў майстра мінскай будаўнічай арганізацыі ў халатнасці, якая прывяла да гібелі чалавека

10 чэрвеня, Позірк. Следчы камітэт устанавіў абставіны парушэння правілаў бяспекі будаўнічых работ, што пацягнула па неасцярожнасці смерць чалавека ў Мінску, паведаміла 10 чэрвеня ведамства.

Паводле звестак следства, у верасні мінулага года 37-гадовы падсобны рабочы “ў парушэнне патрабаванняў бяспекі пры правядзенні будаўнічых работ быў задзейнічаны пры вырабе плоскіх сетак, аб’ёмных каркасаў і арматурных нарыхтовак”. Пры гэтым ён “знаходзіўся ў касцы з расшпіленым рамянём, а таксама без ахоўнага пояса”, адзначае СК.

“У нейкі момант мужчына страціў раўнавагу і ўпаў у тэхналагічны праём у перакрыццях паміж 4-м і 5-м паверхамі, прызначаны для ўладкавання ліфтавага абсталявання. Мужчыну экстранна шпіталізавалі ва ўстанову аховы здароўя, але, нягледзячы на аказаную медыцынскую дапамогу, праз некалькі дзён ён памёр”, — гаворыцца ў паведамленні.

Згодна з матэрыяламі крымінальнай справы, 45-гадовы майстар арганізацыі, з’яўляючыся “асобай, адказнай за выкананне правілаў аховы працы і бяспечнае правядзенне работ (у тым ліку на вышыні), наўмысна дапусціў грубыя парушэнні патрабаванняў бяспекі”. “Ведаючы аб наяўнасці небяспечных вытворчых фактараў на будаўнічым аб’екце, фігурант не забяспечыў належнае ўтрыманне працоўных месцаў, а таксама дапусціў да выканання вышынных работ супрацоўніка, які не меў неабходных сродкаў індывідуальнай абароны”, — паведамляе камітэт.

Заяўляецца, што тэхналагічны праём, у які ўпаў загінулы, “не быў агароджаны і не закрываўся суцэльным насцілам, як таго патрабуюць стандарты бяспекі пры працы на вышыні”.

Крымінальная справа ўзбуджаная паводле ч. 2 арт. 303 Крымінальнага кодэкса (парушэнне правілаў бяспекі будаўнічых работ, што пацягнула па неасцярожнасці смерць чалавека). Максімальнае пакаранне, якое пагражае фігуранту, складае сем гадоў пазбаўлення волі.

У красавіку гэтага года намеснік міністра працы і сацыяльнай абароны Алег Такун паведаміў, што за апошнія 20 гадоў вытворчы траўматызм у Беларусі скараціўся ў тры разы, смяротны — у два. Паводле яго слоў, у 2025 годзе зафіксаваны гістарычны мінімум колькасці смяротных выпадкаў на працы — 103.

Паводле даных Мінпрацы, асноўны фактар траўматызму — недапрацоўка наймальніка (недастатковая падрыхтоўка працоўных месцаў, адсутнасць распрацаваных інструкцый, навучання і інш.).