Беларусь трэці месяц запар з’яўляецца аўтсайдарам у ЕАЭС па дынаміцы прамысловай вытворчасці

11 чэрвеня, Позірк. Па выніках студзеня — красавіка 2026 года Беларусь заняла пятае месца ў Еўразійскім эканамічным саюзе (ЕАЭС) па дынаміцы прамысловай вытворчасці ў параўнанні з аналагічным перыядам 2025-га, сведчыць праведзены “Позіркам” аналіз даных дэпартамента статыстыкі Еўразійскай эканамічнай камісіі (ЕЭК).

У цэлым па ЕАЭС аб’ём прамысловай вытворчасці ў першай траціне 2026 года павялічыўся на 0,8%. У Кыргызстане адзначаны рост на 14,7%, Арменіі — на 13%, Казахстане — на 1,9%, Расіі — на 0,7%; у Беларусі знізіўся на 2,5%.

Па выніках студзеня 2026-га Беларусь па гэтым паказчыку знаходзілася на чацвёртым месцы, студзеня — лютага і студзеня — сакавіка — на пятым.

Паводле даных Белстата, прамысловая вытворчасць у студзені — красавіку 2026 года ў бягучых цэнах склала 70 млрд рублёў — на 2,5% менш, чым за чатыры месяцы 2025-га. У студзені прамвытворчасць скарацілася на 3,4%, у студзені — лютым — на 3,7%, студзені — сакавіку — на 3,4%.

Па выніках чатырох месяцаў аб’ём складскіх запасаў прамысловай прадукцыі ў грашовым выражэнні склаў 11 млрд 755 млн 249 тыс. рублёў — на 5,3% больш, чым за першую траціну 2025-га (11 млрд 166 млн 940 тыс.), і ў 2,1 раза больш, чым за той жа перыяд 2021-га (5 млрд 547 674 тыс.), сведчыць праведзены “Позіркам” аналіз даных Белстата.