Ціханоўская правяла ў Варшаве брыфінг для дыпламатаў з 29 краін

16 чэрвеня, Позірк. Брыфінг для амбасадараў і дыпламатаў з 29 краін правяла 16 чэрвеня ў амбасадзе Італіі ў Варшаве дэмакратычны лідар Святлана Ціханоўская, паведаміла яе прэс-служба.

На брыфінгу прысутнічалі прадстаўнікі Аўстраліі, Аўстрыі, Бельгіі, Вялікабрытаніі, Венгрыі, Германіі, Грэцыі, ЗША, Ірландыі, Ісландыі, Іспаніі, Канады, Латвіі, Літвы, Люксембурга, Мальты, Нарвегіі, Новай Зеландыі, Польшчы, Партугаліі, Румыніі, Славакіі, Славеніі, Украіны, Фінляндыі, Францыі, Харватыі, Швецыі і Японіі.

Таксама ў мерапрыемстве ўдзельнічалі намеснік кіраўніка Аб’яднанага пераходнага кабінета Павел Латушка, дарадца Ціханоўскай па дыпламатычных пытаннях Дзяніс Кучынскі і яе галоўны дарадца Франак Вячорка.

Адзначаецца, што на палітык азнаёміла дыпламатаў з планамі дэмакратычных сіл, намаганнямі па вызваленні палітычных зняволеных, санкцыйнай палітыкай і заявіла аб неабходнасці падтрымкі незалежных СМІ і грамадзянскай супольнасці.

Ціханоўская таксама адзначыла важнасць працягу ціску на рэжым Аляксандра Лукашэнкі да “спынення рэпрэсій і пачатку сістэмных зменаў у Беларусі”. Акрамя таго, яна “нагадала пра неабходнасць выдачы большай колькасці шэнгенскіх віз для беларусаў”.

Паводле слоў Ціханоўскай, цяпер неабходна “даць новы імпульс, умацаваць магчымасці і падрыхтавацца да новых магчымасцяў, якія могуць узнікнуць, калі ніхто іх не чакае”.

“І я ведаю, што мы не адны на гэтым шляху. У нас ёсць саюзнікі. У нас ёсць вы. Мы ёсць адно ў аднаго. І разам мы ўсё пераадолеем”, — заявіла дэмлідар.