Рассельгаснагляд вярнуў у Беларусь саджанцы туі

18 чэрвеня, Позірк. Аб вяртанні ў Беларусь аўтамашыны, якая перавозіла 60 саджанцаў дэкаратыўных туй, паведаміла 18 чэрвеня Федэральная служба РФ па ветэрынарным і фітасанітарным наглядзе (Рассельгаснагляд).

Аўтамабіль ехаў з вёскі Сялец Магілёўскай вобласці ў Нявіннамыск Стаўрапольскага краю і быў спынены супрацоўнікамі ўпраўлення Рассельгаснагляду Бранскай, Смаленскай і Калужскай абласцей і УМВД Расеі Смаленскай вобласці паблізу расійска-беларускай мяжы 13 чэрвеня.

Падчас праверкі грузу ўстаноўлена, што ў кіроўцы, грамадзяніна Беларусі, адсутнічаў фітасанітарны сертыфікат на падкаранцінную прадукцыю.

17 чэрвеня аўтамашына з грузам вернутая да месца адгрузкі ў Беларусь, перавозчык прыцягнуты да адміністрацыйнай адказнасці.

29 траўня Рассельгаснагляд паведаміў аб вяртанні ў Беларусь аўтамашыны, якая перавозіла 75 дэкаратыўных саджанцаў хвойных раслін. Тады транспартны сродак пад кіраваннем грамадзяніна Беларусі рухаўся з Гродзенскай вобласці ў Курск.

Адзначалася, што беларус спрабаваў завезці ў Расію саджанцы елкі і ядлоўца пад выглядам туі.