У акваторыі Мінска патануў 56-гадовы мужчына — спрабаваў пераплысці вадаём
27 чэрвеня, Позірк. У акваторыі Мінска 27 чэрвеня патануў жыхар сталіцы, паведамляе прэс-служба Следчага камітэта.
Паводле папярэдніх звестак ведамства, удзень “кампанія з трох чалавек адпачывала на беразе Сляпянскай воднай сістэмы і распівала спіртныя напоі”. Адзначаецца, што 56-гадовы мужчына і 41-гадовая жанчына вырашылі “пераплысці вадаём на хуткасць”.
“Падчас заплыву мінчанін пачаў апускацца пад ваду і неўзабаве знік з поля зроку, — гаворыцца ў паведамленні. — Праз час сябры знайшлі яго на дне вадаёма. Ратавальнікі выцягнулі мужчыну з вады. Пасля правядзення рэанімацыйных мерапрыемстваў медыкі канстатавалі смерць мінчаніна”.
Следчы праводзіць агляд месца здарэння, апытвае відавочцаў. Для высвятлення дакладнай прычыны смерці прызначаная судмедэкспертыза. У справе разбіраецца аддзел СК па Першамайскім раёне Мінска.
Калі меркаваць па апублікаваных кадрах, трагедыя адбылася непадалёк ад Нацыянальнай бібліятэкі, у раёне скрыжавання праспекта Незалежнасці і вул. Філімонава.
