Лукашэнка заявіў пра гатоўнасць да “раўнапраўнага дыялогу” з Канадай

1 ліпеня, Позірк. Пра гатоўнасць да “раўнапраўнага дыялогу” з Канаду заявіў Аляксандр Лукашэнка, віншуючы 1 ліпеня народ гэтай краіны з нацыянальным святам — Днём Канады.

“Абвяшчэнне Канадскай канфедэрацыі ў гэты дзень 159 гадоў таму стала пачаткам ўпэўненага руху вашай краіны да незалежнасці”, — цытуе віншавальніка яго прэс-служба.

Паводле слоў Лукашэнкі, “шчырае імкненне берагчы і ўмацоўваць суверэнітэт як адну з найвышэйшых каштоўнасцяў” аб’ядноўвае беларусаў і канадцаў.

“Мы высока цэнім досвед гуманітарнага ўзаемадзеяння, які існуе паміж нашымі народамі”, — гаворыцца ў віншаванні.

Згаданы “раўнапраўны дыялог”, як заяўляе аўтар паслання, “адкрые новыя гарызонты ў рэалізацыі сумеснага патэнцыялу”.

Дэмакратычныя дзяржавы, у тым ліку Канада, не прызналі Лукашэнку легітымным прэзідэнтам пасля выбараў 2020 года. З тых часоў палітык віншуе са святамі не ўлады, а народы гэтых краін.

Атава паслядоўна крытыкуе рэжым Лукашэнкі. Разам з партнёрамі яна не аднойчы сінхранізавала санкцыі супраць Мінска. Канада падтрымлівае дэмакратычныя памкненні беларускага народа. Дэмакратычны лідар Святлана Ціханоўская наведвала Канаду ў лістападзе 2022 года, красавіку 2024-га і лістападзе 2024-га.