Літва зафіксавала рэкордную за апошнія 55 дзён колькасць спробаў парушэння мяжы з боку Беларусі
20 ліпеня, Позірк. Рэкордную за апошнія 55 дзён колькасць спробаў парушэння мяжы з боку Беларусі — 28 — зафіксавала 19 ліпеня Служба аховы дзяржаўнай мяжы Літвы (САДМ).
Папярэдні раз больш было 25 траўня — 38 спробаў, у наступны перыяд — ад 0 да 20.
З пачатку ліпеня Літва зарэгістравала 88 спробаў незаконнага пранікнення на сваю тэрыторыю з Беларусі — у 2,9 раза больш, чым за 19 дзён чэрвеня (30), і на 46,7% больш, чым за ўвесь ліпень мінулага года (60).
Дзяржаўная памежная ахова Латвіі фіксуе незаконныя спробы перасекчы мяжу з боку Беларусі штодня з 25 сакавіка. За гэты час (117 дзён) іх колькасць дасягнула 8.165. За папярэдні дзень, 19 ліпеня, адзначана мінімальная актыўнасць — 2 спробы. Да гэтага самым нізкім быў паказчык за 10 траўня — 6 спробаў.
Памежная ахова Польшчы дае справаздачу аб спакоі ля сваёй мяжы з Беларуссю шэсць дзён запар, аднак з пачатку месяца спробаў зарэгістравана ў 3,6 раза больш, чым за ўвесь чэрвень (51 супраць 14).
