Палітвязнямі прызнаныя яшчэ восем чалавек

31 ліпеня, Позірк. Праваабарончая супольнасць 31 ліпеня прызнала палітычнымі вязнямі яшчэ восем чалавек, вынікае з сумеснай заявы, апублікаванай, у прыватнасці, на сайце праваабарончага цэнтра “Вясна”.

Гэта другая такая заява за дзень. Раніцай палітвязнямі было прызнана 13 чалавек.

Адпаведны статус атрымалі асуджаныя да пазбаўлення волі Віталь Мусіловіч (арт. 130, 361¹, 368, 369 КК), Вадзім Сараковік (арт. 130, 361⁴), Андрэй Судзібор (арт. 130), Аляксандр Аўдзевіч (арт. 130, 342, 361⁴, 367, 368), Аляксандр Яжэўскі (арт. 356), Аляксей Шахлай (арт. 342, 352), Міхаіл Філіпенка (арт. 361³), а таксама Мікалай Багданчык (арт. 295, 361⁴, 367, 368), асуджаны да абмежавання волі ў папраўчай установе адкрытага тыпу.

Праваабаронцы заявілі, што лічаць пазбаўленне волі гэтых людзей палітычна матываваным. На іх думку, у кожным з разгледжаных выпадкаў крымінальны пераслед насіў палітычны характар, а пазбаўленне волі суправаджалася парушэннем права на справядлівае судовае разбіральніцтва і іншымі парушэннямі правоў чалавека.

Асобна аўтары заявы выказалі занепакоенасць практыкай прымянення арт. 356 КК (здрада дзяржаве). Яны адзначылі, што абвінавачванні паводле гэтага артыкула працягваюць выкарыстоўвацца для падаўлення правоў і свабод грамадзян, у тым ліку за правамерныя альбо антываенныя дзеянні, а расплывістыя фармулёўкі артыкула дазваляюць прызначаць працяглыя тэрміны зняволення за дзеянні, якія “фактычна не замахваюцца на інтарэсы дзяржавы і грамадства”.

Праваабаронцы запатрабавалі неадкладна вызваліць усіх палітычных зняволеных, перагледзець палітычна матываваныя прысуды і спыніць палітычныя рэпрэсіі.

Заяву падпісалі праваабарончы цэнтр “Вясна”, “Прававая ініцыятыва”, Lawtrend і Беларускі ПЭН.

Даведка “Позірку”:

арт. 130 — распальванне варожасці або варажнечы;

арт. 295 — незаконныя дзеянні ў дачыненні да агнястрэльнай зброі, боепрыпасаў і выбуховых рэчываў;

арт. 342 — арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх;

арт. 352 — неправамернае завалоданне камп’ютарнай інфармацыяй;

арт. 356 — здрада дзяржаве;

арт. 361¹ — стварэнне экстрэмісцкага фарміравання альбо ўдзел у ім;

арт. 361³ — фінансаванне ўдзелу грамадзян ва ўзброеным канфлікце або ваенных дзеяннях на тэрыторыі замежнай дзяржавы;

арт. 361⁴ — садзейнічанне экстрэмісцкай дзейнасці;

арт. 367 — паклёп у дачыненні да прэзідэнта;

арт. 368 — абраза прэзідэнта;

арт. 369 — абраза прадстаўніка ўлады.