У ліпені 2026 года “БелДжы” прадаў на рынку РФ на чвэрць менш новых аўтамабіляў, чым годам раней
Паслядоўна-паралельны гібрыд Belgee X80 PHEV
6 жніўня, Позірк. У ліпені 2026 года беларуска-кітайскі вытворца “БелДжы” рэалізаваў на расійскім рынку 4.891 новы аўтамабіль маркі Belgee — на 24,9% менш, чым за той жа месяц 2025-га, паведамляе аналітычнае агенцтва “Аўтастат”.
Гэта 6-е месца сярод усіх марак, прадстаўленых у РФ. Доля рынку склала 4% (годам раней — 5,4%).
Лідарамі продажаў у справаздачны перыяд сталі LADA — 29.227 (+3,5%), кітайскі Haval — 15.606 (+19%), а таксама расійска-кітайскі TENET — 12.550 (у мінулым ліпені брэнд на рынку не быў прадстаўлены).
За сем месяцаў было прададзена 33.702 аўтамабілі Belgee (+38,4%; 24.344). Гэта 5-е месца сярод усіх марак, прадстаўленых у РФ. Доля рынку склала 4,6% (годам раней — 3,7%).
Сярод канкурэнтаў найлепшыя паказчыкі ў LADA — 181.357 (-1,3%), Haval — 99.719 (+29,5%) і TENET — 76.546.
За ўвесь 2025 год было прададзена 69.091 аўтамабіль беларуска-кітайскага брэнда (34.775; рост амаль удвая) — 5-е месца. Лідарамі продажаў сталі LADA (330.357; -14,7%), Haval (173.434; -9,5%), Chery (99.936; -36,7%), Geely (93.988; -37,3%).
Раней генеральны дырэктар “БелДжы” Генадзь Свідзерскі паведамляў, што акцыянеры паставілі задачу заняць 1-е месца на ўнутраным рынку Беларусі і актыўна змагацца за 2-ю пазіцыю ў Расіі.
Продажы “БелДжы” ў Расіі пачаліся ў верасні 2023 года. У першы месяц было рэалізавана 19 аўтамабіляў.
Першапачаткова прадавалася толькі адна мадэль — красовер X50, створаны на аснове Geely Coolray. Сёлета ўвесну ў продажы з’явілася абноўленая версія мадэлі пад назвай X50+, якая замяніла папярэднюю.
24 ліпеня 2024 года брэнд абвясціў пра старт продажаў у дылерскіх цэнтрах РФ універсальнага сярэднепамернага красовера X70 (даступны як з пярэднім, так і з поўным прывадам, а таксама з сістэмай “мяккага” гібрыда).
З канца верасня 2025 года расіянам даступны седан S50. Як адзначалі эксперты рынку, мадэль прадавалася ў РФ ад 1,85 млн расійскіх рублёў (каля 22,9 тыс. долараў). Для параўнання, цэны на аналаг — Geely Emgrand — на той момант пачыналіся з 2,18 млн (27 тыс.).
Дэмпінг стаў, на думку экспертаў, адной з асноўных прычын імклівага росту продажаў беларуска-кітайскага аўтамабіля.
Завод “БелДжы” быў адкрыты 17 лістапада 2017 года ў Барысаўскім раёне (Мінская вобласць). Цяпер яго акцыянерамі з’яўляюцца Рэспубліка Беларусь і кітайскія кампаніі Zhejiang Jirun Automobile, CITICC International Investment Limited, Shenzhen Shentou Investment.
