За тыдзень фізічныя асобы ўвезлі ў Беларусь на льготных умовах 251 электрамабіль

8 жніўня, Позірк. За тыдзень фізічныя асобы ўвезлі ў Беларусь на льготных умовах 251 электрамабіль, сведчыць праведзены “Позіркам” аналіз даных Дзяржаўнага мытнага камітэта.

Паводле інфармацыі ведамства, у рамках адведзенай квоты на 31 ліпеня фізічным асобам можна было ўвезці ў краіну без выплаты пошліны 1.511 электрамабіляў, а на 7 жніўня — 1.260.

Згодна з пастановай Савета міністраў № 223 ад 5 траўня, на працягу года фізічныя асобы могуць прывезці ў краіну на льготных умовах 6,2 тыс. электрамабіляў. Такім чынам, іх доля квоты выбрана на 79,7%.

Юрыдычныя асобы ў адпаведнасці з гэтым дакументам маглі ўвезці без пошліны 13,8 тыс. электрамабіляў. Сваю частку квоты, як вынікае з даных ДМК, яны закрылі да 24 ліпеня. “З улікам вычарпання квоты на бяспошлінны ўвоз электрамабіляў юрыдычнымі асобамі пры планаванні імпарту варта ўлічваць неабходнасць выплаты ўвознай мытнай пошліны ў памеры 15% ад кошту транспартнага сродку”, — звярнула ўвагу ведамства.

Раней кіраўнік ведамства Уладзімір Арлоўскі заяўляў, што агульны ліміт для Беларусі вызначаны ў рамках дамоўленасцяў у Еўразійскім эканамічным саюзе: “Квота ўсталяваная ў памеры 20 тыс. аўтамабіляў [на год]”.

Абмежаванне ўведзенае рашэннем ЕЭК летась у снежні.

У чэрвені 2026 года прадпрыемства “Белтэхагляд” выдала на электрамабілі 2.696 дазволаў (годам раней — 1.635; рост у 1,6 раза) на допуск да ўдзелу ў дарожным руху.

Паводле даных “БАА-Кансалт” (даччынае прадпрыемства Беларускай аўтамабільнай асацыяцыі), па выніках чэрвеня прададзена 2,4 тыс. адзінак — на 31% менш за майскі вынік. Адзначалася, што “такое зніжэнне асабліва прыкметнае на фоне папярэдніх месяцаў, калі менавіта электрамабілі былі адным з найбольш хуткарослых сегментаў рынку новых аўтамабіляў”.

Паводле тыпаў рухавікоў прададзеныя ў Беларусі ў 2025 годзе мадэлі размеркаваліся наступным чынам: РУЗ — 82,17% агульнай колькасці, электрычныя — 12,48%, гібрыды — 5,35%.