Новым начальнікам гомельскай жаночай калоніі стаў паніжаны ў пасадзе палкоўнік Лаўрыноўскі
12 жніўня, Позірк. Новым начальнікам гомельскай папраўчай калоніі №4 для ўпершыню асуджаных жанчын стаў палкоўнік унутранай службы МУС Аляксандр Лаўрыноўскі, паведамляе праваабарончы тэлеграм-канал MAYDAY.TEAM.
41-гадовы Лаўрыноўскі раней займаў пасаду намесніка начальніка па арганізацыі папраўчага працэсу ўпраўлення Дэпартамента выканання пакаранняў (ДВП) МУС па Гомельскай вобласці. Такім чынам, ён пайшоў на паніжэнне ў пасадзе.
Адзначаецца, што ён таксама працаваў начальнікам штаба Гомельскага СІЗА №3.
У красавіку 2024 года Лаўрыноўскі афіцыйна выступаў ад імя абласнога ДВП на мерапрыемстве ў калоніі №4, паведамляла абласная бібліятэка Гомельскай вобласці.
Заяўлялася, што падчас прэзентацыя праекта “Гомельскі полк народнага апалчэння: гісторыя, подзвіг, памяць“ была праведзена экскурсія “для спецкантынгенту“. Зняволеныя былі азнаёмленыя з дакументамі і матэрыяламі пра гісторыю стварэння, дзейнасці, арганізатараў і ўдзельнікаў гомельскага палка народнага апалчэння ў першыя месяцы Вялікай Айчыннай вайны.
Ранейшы кіраўнік папраўчай калоніяй №4 у Гомелі Станіслаў Кавалёў быў прызначаны на гэтую пасаду ў жніўні 2024 года, змяніўшы на пасадзе Дзяніса Таўсцянкова. Да гэтага прызначэння Кавалёў працаваў у гэтай жа калоніі намеснікам начальніка па рэжыме і аператыўнай працы.
Праваабарончая база Dissidentby адносіць Кавалёва да супрацоўнікаў сілавых структур, датычных да палітычных рэпрэсій. У базе пазначана, што ён быў звязаны з ужываннем гвалту, неналежнымі ўмовамі ўтрымання палітвязняў у калоніі, псіхалагічным ціскам на жанчын, а таксама з распараджэннямі аб ізаляцыі, адмове ў медыцынскай дапамозе і пазбаўленні перадач.
Паводле даных праваабаронцаў, на 9 жніўня па палітычна матываваных крымінальных справах асуджана 2.089 жанчын. У зняволенні знаходзяцца 120 жанчын-палітвязняў, сярод якіх шматдзетныя маці, пенсіянеркі, жанчыны з сур’ёзнымі захворваннямі.
Па стане на 8 сакавіка 2026 года крымінальнаму пераследу з пачатку 2020 года падвергнулася мінімум 40 шматдзетных маці, 62 жанчыны з сур’ёзнымі праблемамі са здароўем, 82 жанчыны пенсійнага ўзросту, а таксама не менш за 29 жанчын з замежным грамадзянствам.
Абсалютная большасць з іх прайшла праз калонію №4 у Гомелі.
Масавыя палітычныя рэпрэсіі ў Беларусі не спыняюцца дагэтуль.
Гл. таксама:
Лукашэнка назваў жанчын “самым каштоўным” у жыцці
Жаночая калонія ў Гомелі — гэта “дно дна”, сцвярджае заснавальніца ініцыятывы “Палітвязынка”
