Аман прызначыў першага амбасадара з рэзідэнцыяй у Мінску — МЗС Беларусі
Максім Рыжанкоў (злева) і Бадр бін Хамад бін Хамуд аль Бусаідзі на сустрэчы ў Нью-Ёрку 25 верасня 2026 года
26 верасня, Позірк. Аб прызначэнні першага ў гісторыі амбасадара Амана з рэзідэнцыяй у Мінску і яго хуткім прыбыцці ў Беларусь паведаміў кіраўнік аманскага знешнепалітычнага ведамства Бадр бін Хамад бін Хамуд аль Бусаідзі на сустрэчы з беларускім калегам Максімам Рыжанковым 25 верасня ў Нью-Ёрку, дзе праходзіць 81-я сесія Генеральнай Асамблеі ААН.
Інфармацыю аб прызначэнні амбасадара апублікаваў беларускі МЗС. У прэс-рэлізе аманскага МЗС па выніках сустрэчы пра гэта нічога не гаворыцца.
Знешнепалітычнае ведамства арабскай краіны паведаміла, што асноўная ўвага была нададзеная “рэалізацыі праграм супрацоўніцтва, эканамічнаму і інвестыцыйнаму партнёрству паміж дзвюма краінамі, а таксама найбольш эфектыўнаму выкарыстанню Сумеснага камітэта па супрацоўніцтве і інвестыцыях для прасоўвання праектаў і наладжвання партнёрскіх адносін паміж адпаведнымі ўстановамі (створаны 19 траўня 2025 года. — “Позірк“.)“.
Міністры “абмеркавалі магчымасці развіцця гандлю і турызму ў святле мер па аблягчэнні ўзаемных паездак“.
Разгледжаныя таксама “рэгіянальныя і міжнародныя падзеі“, “іх наступствы для бяспекі і эканомікі“. Падкрэслена “важнасць іх вырашэння шляхам дыялогу і мірнымі сродкамі“.
Паводле інфармацыі беларускага МЗС, абмеркаваныя “перспектывы рэалізацыі сумесных праектаў з удзелам аманскіх інвестыцый, уключаючы стварэнне зборачных вытворчасцяў беларускай тэхнікі ў сферы вытворчасці прадуктаў харчавання і дзіцячага харчавання“. Закранутыя “пытанні культурных і адукацыйных абменаў, уключаючы будучыя гастролі беларускіх і аманскіх творчых калектываў і абмен студэнтамі“. Адзначаны “рост турыстычных плыняў і цікавасць аманскіх грамадзян да атрымання медыцынскіх паслуг у Беларусі“, падкрэсленая “важнасць работы па запуску прамога авіяспалучэння паміж краінамі“.
У лютым 2026 года Беларусь і Аман прынялі рашэнні адкрыць амбасады на тэрыторыі адзін аднаго.
17 сакавіка 2026 года набыло моц пагадненне аб узаемнай адмене віз. Яно было падпісанае 6 кастрычніка 2025 года падчас візіту ў Мінск султана Амана Хайсама бен Тарэка Аль Саіда.
Гл. таксама:
Оманский султан в гостях у Лукашенко. “Дальняя дуга“, которая так и не приблизилась (на рускай мове)
