Польшча адзначае зніжэнне паставак яблыкаў у Беларусь
6 кастрычніка, Позірк. У верасні 2026 года Польшча экспартавала за межы Еўрасаюза 15,4 тыс. тон яблыкаў — на 42% больш, чым годам раней, і на 14% больш, чым у 2024-м, паведамляе спецыялізаваны партал SadyOgrody.
Пры гэтым, згодна з данымі польскага боку, у Беларусь было пастаўлена толькі 772 т, тады як, напрыклад, у верасні 2021 года пастаўкі склалі амаль 3 тыс. т.
Больш за ўсё польскіх яблыкаў, як і ў жніўні, набыў Егіпет — 9,4 тыс. т. Другой стала Індыя, якая закупіла 1,9 тыс. т. На трэцім месцы Манголія — 919 т. Прыкметна вырас экспарт у Калумбію: у верасні Польшча накіравала туды 862 т яблыкаў супраць 255 т годам раней.
Беларусь страціла лідарства сярод пакупнікоў польскіх яблыкаў яшчэ ў жніўні — перамясцілася на другое месца, закупіўшы 527 т гэтай садавіны. У Варшаве звязалі гэта з “умяшаннем дзяржавы і палітыкай абароны ўнутранай вытворчасці з боку Мінска напярэдадні збору ўраджаю”.
24 верасня ўрад Беларусі абвясціў пра ўвядзенне ліцэнзавання імпарту яблыкаў на шасцімесячны тэрмін. Згодна з адпаведнай пастановай, увоз яблыкаў, вырашчаных па-за дзяржавамі ЕАЭС, магчымы на падставе разавых ліцэнзій, якія выдае Міністэрства антыманапольнага рэгулявання і гандлю на ўзгадненне з Мінсельгасхарчам.
Урад адзначаў, што “пастанова прынятая ў мэтах забеспячэння ўнутранага рынку айчыннымі яблыкамі ў міжсезонны перыяд у поўным аб’ёме, зыходзячы з высокага ўраджаю”.
22 верасня старшыня Брэсцкага аблвыканкама Пётр Пархомчык заявіў у эфіры дзяржаўнага тэлеканала СТБ, што разлічвае атрымаць у рэгіёне ўраджай яблыкаў у межах 130–150 тыс. тон. Пры гэтым ён агучыў ідэю часовай забароны на ўвоз садавіны: “Настойваем, каб увоз у Беларусь імпартнага яблыка быў тэрмінова прыпынены. Вы бачыце, які выгляд нашых яблыкаў, прытым розныя гатункі, смакавыя якасці. Краіна можа спакойна есці якасныя беларускія яблыкі”.
