Украіна ўвяла санкцыі супраць беларускай крыптаплатформы
12 кастрычніка, Позірк. Прэзідэнт Украіны Уладзімір Зяленскі падпісаў 11 кастрычніка ўказ № 1037/2026 аб увядзенні ў дачыненні да беларускага ЗАТ “Уайт Берд” (JSC White Bird) “персанальных спецыяльных эканамічных і іншых абмежавальных мер (санкцый)”. Згодна з дакументам, гэта зроблена на падставе пастановы Рады нацыянальнай бяспекі і абароны Украіны ад 30 верасня.
Міністэрству замежных спраў даручана “праінфармаваць кампетэнтныя органы Еўрапейскага саюза, Злучаных Штатаў Амерыкі і іншых дзяржаў аб прымяненні санкцый і падняць перад імі пытанне аб увядзенні аналагічных абмежавальных мер”, гаворыцца ва ўказе.
Кампанія “Уайт Берд” зарэгістраваная ў Мінску 23 ліпеня 2024 года. Як указана на яе сайце, гэта — “найбуйнейшая легальная крыптаплатформа”. З’яўляецца рэзідэнтам Парка высокіх тэхналогій.
Кіеў рэгулярна ўводзіць санкцыі ў дачыненні да беларускіх кампаній. У асноўным яны звязаны з ваенна-прамысловым комплексам.
24 лютага 2022 года Расія пачала поўнамаштабную вайну супраць Украіны — найбуйнейшую ў Еўропе пасля Другой сусветнай. Рэжым Аляксандра Лукашэнкі прадаставіў арміі РФ тэрыторыю для нападу на суседнюю краіну ўзімку і ўвесну 2022 года, а затым на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Паводле звестак журналістаў-расследвальнікаў, многія беларускія прадпрыемствы цяпер актыўна займаюцца вытворчасцю на карысць расійскага вайскова-прамысловага комплексу.
