МЗС Германіі рэкамендаваў грамадзянам устрымацца ад паездак у Беларусь

25 лютага, BPN. Міністэрства замежных спраў Германіі рэкамендавала сваім грамадзянам устрымацца ад паездак у Беларусь.

У паведамленні знешнепалітычнага ведамства гаворыцца, што цяпер закрыты памежныя пераходы з Украінай, а таксама кантрольна-прапускны пункт Кузніца — Брузгі на беларуска-польскай мяжы. “Не выключаныя далейшыя закрыцці. Абвешчаныя дадатковыя меры кантролю на памежных пераходах у Літву, Польшчу і Латвію”, — папярэдзілі дыпламаты.

Еўрапейская рада, нагадалі ў МЗС Германіі, заклікала авіякампаніі пазбягаць паветранай прасторы Беларусі, а беларускія легкавыя аўтамабілі “больш не пускаюць у еўрапейскія краіны”.

Адзначаецца, што ў сувязі з ваеннай агрэсіяй РФ у дачыненні да Украіны дзейнічаюць абмежаванні на авіязносіны з Беларуссю — не выконваюцца некаторыя рэйсы праз трэція краіны (у першую чаргу гэта тычыцца Турцыі), якія звязвалі яе з краінамі ЕС. Частка паветранай прасторы над Беларуссю ўжо зачыненая.

У МЗС Германіі таксама нагадалі, што “ўнутрыпалітычная сітуацыя ў Беларусі застаецца напружанай пасля прэзідэнцкіх выбараў 9 жніўня 2020 года”.

Знешнепалітычнае ведамства сярод усяго іншага рэкамендуе немцам, якія знаходзяцца на тэрыторыі Беларусі, “адмовіцца ад нашэння чырвона-белага адзення, заўсёды насіць дакументы”, а таксама ўлічваць, што “доступ у інтэрнэт можа быць заблакаваны ў любы момант”, не рабіць фатаграфіі і відэазапісы ваенных вучэнняў, аб’ектаў ці іншых месцаў, якія маюць стратэгічнае значэнне, паколькі за гэта “магчымыя суровыя пакаранні аж да арышту”.

Раней устрымацца ад наведвання Беларусі сваім грамадзянам рэкамендавалі Вялікабрытанія, Канада і ЗША.