Два зборнікі твораў Дуніна-Марцінкевіча прызнаныя “экстрэмісцкімі матэрыяламі”

14 лістапада, Позірк. Суд Жыткавіцкага раёна (Гомельская вобласць) прызнаў “экстрэмісцкімі матэрыяламі” два зборнікі твораў класіка беларускай літаратуры Вінцэнта Дуніна-Марцінкевіча.

Рашэнне было прынята 8 лістапада, вынікае з запісу ў Рэспубліканскім спісе экстрэмісцкіх матэрыялаў на сайце Міністэрства інфармацыі.

“Экстрэмісцкі” статус прысвоены двум тамам драматычных твораў, вершаваных аповесцяў, апавяданняў, вершаў, публіцыстыкі, лістоў і пасланняў. Кнігі надрукаваныя выдавецтвам “Мастацкая літаратура” ў 2007 і 2008 гадах.

Паведамляецца, што ў зборніках знойдзеныя прадмова літаратуразнаўца Язэпа Янушкевіча, а таксама вершы “Плывуць вятры” і “Гутарка старога дзеда”.

У жніўні гэтага года згаданыя прадмова і вершы са зборніка выбраных твораў Вінцэнта Дуніна-Марцінкевіча, які выдадзены праектам “Беларускі кнігазбор”, прызнаныя “экстрэмісцкімі матэрыяламі”. Рашэнне прынята па заяве пракуратуры Мінска.

Вершы напісаны прыкладна ў 1861 годзе — незадоўга да паўстання Кастуся Каліноўскага (1863-1864 гады). Яны прысвечаныя барацьбе за вызваленне беларусаў ад расійскага імперскага ўплыву.

Некаторыя эксперты лічаць, што твор “Гутарка старога дзеда” маглі напісаць літаратары таго ж перыяду Уладзіслаў Сыракомля або Вінцэнт Каратынскі. На вуліцы Дуніна-Марцінкевіча знаходзіцца Мінскі гарадскі суд.

Вінцэнт Дунін-Марцінкевіч — беларускі паэт, драматург, тэатральны дзеяч. Заснавальнік нацыянальнай драматургіі, тэатра, лічыцца першым класікам новай беларускай літаратуры.

Гл. таксама:

Беларускія ўлады злоўжываюць антытэрарыстычным і антыэкстрэмісцкім заканадаўствам-спецдакладчык ААН