Затрыманыя са стральбой жыхары Крупскага раёна сталі фігурантамі справы пра “ўзброены супраціў” сілавікам
Фота мае ілюстрацыйны характар
24 лістапада, Позірк. Двое жыхароў Крупскага раёна (Мінская вобласць), затрыманых са стральбой 21 лістапада ў вёсцы Вялікі Лес, сталі фігурантамі крымінальнай справы пра “ўзброены супраціў” сілавікам, распачатай паводле арт. 364 (гвалт і пагроза яго прымянення ў дачыненні да супрацоўніка органаў унутраных спраў у мэтах перашкоды яго законнай дзейнасці), гаворыцца ў паведамленні Следчага камітэта.
“Следчыя будуць хадайнічаць перад пракурорам аб прымяненні да іх меры стрымання ў выглядзе ўзяцця пад варту”, — адзначыла 24 лістапада прэс-служба СК.
У дзень здарэння Міністэрства ўнутраных спраў паведаміла пра затрыманне ў згаданай вёсцы “групы ўзброеных людзей” — 62-гадовага гаспадара дома і яго сыноў 36 і 19 гадоў. Па 19-гадовым юнаку, які, як сцвярджалася, “выйшаў на супрацоўнікаў з двума нажамі, выказваючы пагрозы”, быў адкрыты агонь на паражэнне. Ён застаўся ў жывых, яго шпіталізавалі. На апублікаваным МУС відэазапісе было бачна, што двое старэйшых мужчын выйшлі з дому без зброі і на патрабаванне сілавікоў беспярэчна леглі на зямлю.
У той жа час СК у паведамленні ад 24 лістапада сцвярджае, што мужчыны “зачынілі дзверы знутры і спрабавалі ў нецэнзурнай форме прагнаць прадстаўнікоў закона”, а пазней старэйшы сын, “спрабуючы пазбегнуць арышту, ударыў міліцыянера”. Менавіта ў дачыненні да яго і яго параненага брата ўзбуджана крымінальная справа.
21 лістапада начальнік аддзела ўпраўлення ГУБАЗіК МУС па Мінскай вобласці Сяргей Зубараў, каментуючы тое, што адбылося ў Вялікім Лесе, заявіў, што ў затрыманай “злачыннай групы” знойдзены “значны арсенал халоднай, агнястрэльнай зброі, боепрыпасаў і выбуховых рэчываў”.
Гл. таксама:
Два дні запар МУС паведамляе аб выпадках стральбы ў падазраваных, адзін чалавек загінуў