Прэс-служба Лукашэнкі паведаміла аб пачатку яго візіту ў “афрыканскія краіны”

9 снежня, Позірк. “З сённяшняга дня пачынаецца афіцыйны візыт прэзыдэнта Беларусі ў афрыканскія краіны. У рамках візіту Аляксандр Лукашэнка наведае шэраг краін афрыканскага кантынента”, — такое паведамленне распаўсюдзіла 9 снежня прэс-служба 69-гадовага палітыка.

“Праца перш за ўсё будзе накіравана на інтэнсіфікацыю ўзаемадзеяння па ўсіх узаемавыгадных напрамках. Гэты візіт будзе працягваць мэтанакіраваную работу па ўстанаўленні трывалых сувязей Беларусі з краінамі афрыканскага кантынента. Створаныя база і напрацоўкі будуць выкарыстоўвацца ў супрацоўніцтве і з іншымі дзяржавамі Афрыкі”, — гаворыцца ў прэс-рэлізе.

У паведамленні не ўказваецца, якія краіны наведае Лукашэнка і колькі часу будзе доўжыцца паездка. Магчыма, ён прызямліцца ў Танзаніі, прэзідэнта якой 9 снежня павіншаваў з Днём Незалежнасці.

Сёлета 30 студзеня — 1 лютага Лукашэнка знаходзіўся ў Зімбабвэ.

Лукашэнка пакінуў Беларусь 29 лістапада. Спачатку ён накіраваўся ў Аб’яднаныя Арабскія Эміраты на кліматычны саміт ААН, затым у Пекін на сустрэчу са старшынём КНР Сі Цзіньпінам. Пасля гэтага ён вярнуўся ў ААЭ. Судзячы па афіцыйных фатаграфіях, у паездцы Лукашэнкі суправаджаюць старэйшы сын Віктар (за суткі да пачатку візіту ў ААЭ яму споўнілася 48 гадоў), які займае пасаду прэзідэнта Нацыянальнага алімпійскага камітэта, і 19-летні малодшы сын Мікалай у невядомым статусе.