Маці палітвязня Паўла Севярынца адпусцілі дадому да суда

12 студзеня, Позірк. Маці палітзняволенага палітыка Паўла Севярынца Таццяну Севярынец, затрыманую раніцай 9 студзеня ў Віцебску, адпусцілі дадому да суда, паведаміла 12 студзеня ў сацыяльных сетках яе дачка Ганна Севярынец.

“Мама дома да суда. Перадае ўсім добрым людзям дзякуй за клопат і падтрымку”, — напісала яна.

Пасля затрымання маці Ганна Севярынец паведаміла, што фармальнай прычынай сталі “падпіскі ў “Фэйсбуку”, якіх у той “даўно не было”. 10 студзеня Таццяна Севярынец трапіла ў бальніцу, у яе павысіўся ціск.

Сын затрыманай Павел Севярынец — вядомы апазіцыйны палітык, сустаршыня аргкамітэта па стварэнні партыі “Беларуская хрысціянская дэмакратыя” (БХД) — прызнаны палітвязнем. Быў затрыманы 7 чэрвеня 2020 года, у разгар кампаніі па зборы подпісаў за вылучэнне кандыдатаў у прэзідэнты. Ён у гонцы не ўдзельнічаў, але выкарыстаў перадвыбарчы перыяд для зносін з людзьмі. У той дзень палітык правёў на плошчы ля сталічнага Камароўскага рынку “народны пікет свабоды і салідарнасці”.

25 траўня 2021 года Магілёўскі абласны суд прыгаварыў Севярынца да 7 гадоў пазбаўлення волі ў калоніі ўзмоцненага рэжыму паводле абвінавачвання ў “падрыхтоўцы да масавых беспарадкаў”.

27 жніўня таго ж года Вярхоўны суд не задаволіў скаргу на прысуд.

23 сакавіка 2022 года палітвязень унесены ў пералік асоб, “датычных да экстрэмісцкай дзейнасці”, 21 чэрвеня суд Шклоўскага раёна (Магілёўская вобласць) змяніў яму рэжым утрымання — пастанавіў накіраваць у турму на 3 гады.

30 снежня 2023 года палітыку споўнілася 47 гадоў.