МУС паведаміла пра раскрыццё забойства падлетка ў Баранавічах у 1998 годзе

16 верасня, Позірк. Пра раскрыццё забойства 28-гадовай даўніны ў Баранавічах (Брэсцкая вобласць) паведаміла Міністэрства ўнутраных спраў.

Ведамства адзначае, што ў 1998 годзе ў горадзе на пустцы быў знойдзены труп 17-гадовага падлетка з прыкметамі гвалтоўнай смерці. У той час устанавіць злачынцу не ўдалося, аднак “праца не спынялася ўсе гэтыя гады”.

Падчас “рэалізацыі сумесных мерапрыемстваў” супрацоўнікі МУС атрымалі доказы датычнасці да забойства 57-гадовага жыхара Баранавічаў, гаворыцца ў паведамленні.

Было ўстаноўлена, што ў дзень злачынства ў мужчыны з падлеткам здарыўся канфлікт, падчас якога ён задушыў ахвяру.

Цяпер, як заяўляецца, устанаўліваюцца іншыя эпізоды злачыннай дзейнасці фігуранта.

Супрацоўнікамі органаў унутраных спраў, падкрэслівае МУС, “на пастаяннай аснове праводзяцца аператыўна-вышуковыя мерапрыемствы, накіраваныя на раскрыццё цяжкіх і асабліва цяжкіх злачынстваў мінулых гадоў”.

Сілавыя ведамствы рэгулярна справаздачацца аб раскрыцці злачынстваў шматгадовай даўнасці. Як правіла, гэта звязана з новымі тэхнічнымі магчымасцямі, якія дазваляюць ідэнтыфікаваць асобы падазраваных з дапамогай экспертызы біяматэрыялаў.

Гл. таксама:

Міліцыя паведаміла пра раскрыццё забойства дзяўчынкі, здзейсненага 34 гады таму — падазраецца 11-гадовы брат

Пракуратуры перададзена справа мужчыны, які абвінавачваецца ў згвалтаваннях і забойствах дзяўчынак і маладых жанчын каля 30 гадоў таму