Вінаватыя адкажуць за выкраданне і забойства Ганчара і Красоўскага — Ціханоўская

16 верасня, Позірк. Дэмакратычны лідар Святлана Ціханоўская на сваёй старонцы ў сацсетцы Х нагадала, што 16 верасня 1999 года ў Беларусі бясследна зніклі апаненты Аляксандра Лукашэнкі Віктар Ганчар і Анатоль Красоўскі.

Паводле слоў палітыка, “эскадроны смерці беларускага рэжыму выкралі і забілі” іх, сем’і зніклых дагэтуль”не маюць магчымасці наведаць магілы”.

“Цягам 27 гадоў рэжым адмаўляў іх сем’ям у праўдзе і правасуддзі. Вінаватыя адкажуць”, — напісала Ціханоўская.

Экс-кіраўнік Цэнтрвыбаркама Віктар Ганчар і яго сябар бізнесмен Анатоль Красоўскі зніклі 16 верасня 1999 года. На аснове шматлікіх публікацый СМІ і важных сведчанняў можна з вялікай упэўненасцю сцвярджаць, што палітык і прадпрымальнік былі выкрадзеныя і пазней забітыя на загад Лукашэнкі.

У 2019 годзе былы баец САХРа Юрый Гараўскі заявіў у СМІ, што 7 траўня 1999-га быў у складзе т.зв. “эскадрону смерці”, які на загад камандзіра САХРа Дзмітрыя Паўлічэнкі выкраў і забіў былога міністра ўнутраных спраў Юрыя Захаранку, а 16 верасня таго ж года — Ганчара і Красоўскага.

У верасні 2023 года суд швейцарскага горада Роршах разгледзеў справу аб гвалтоўным знікненні Захаранкі, Ганчара і Красоўскага ў рамках універсальнай юрысдыкцыі. Гвалтоўнае знікненне класіфікуецца як злачынства супраць чалавечнасці. Суд прызнаў Гараўскага невінаватым, палічыўшы недастатковымі доказы яго віны.

Праваабаронцы заявілі, што апраўдальны прысуд не ставіць пад сумнеў злачынствы рэжыму Лукашэнкі.