У Беларусі з’явіцца рэестр пасажырскіх перавозак

26 студзеня, Позірк. Стварэнне “рэестра аўтамабільных перавозак пасажыраў у нерэгулярных зносінах” прадугледжана ўказам № 32, падпісаным 25 студзеня Аляксандрам Лукашэнкам.

Паводле інфармацыі яго прэс-службы, у рэестр, аператарам і ўладальнікам рэестра якога будзе Транспартная інспекцыя Міністэрства транспарту і камунікацый, уключаць звесткі пра перавозчыкаў, транспартныя сродкі (аўтобусы, легкавыя аўтамабілі, аўтамабілі-таксі), кіроўцаў, дыспетчарскія перавозкі ў нерэгулярных зносінах, дыспетчараў таксі.

З 1 жніўня па 31 кастрычніка гэтага года за ўключэнне ў рэестр дзяржаўная пошліна брацца не будзе.

Замежных дыспетчараў, якія жадаюць працаваць на беларускім рынку, згаданы ўказ “Аб аўтамабільных перавозках пасажыраў” абавязвае ствараць юрыдычныя асобы на тэрыторыі краіны.

У цэлым адзначаецца, што нормы дакумента скіраваныя на “ажыццяўленне бяспекі аўтамабільных перавозак”, “стварэнне ўмоў для добрасумленнай канкурэнцыі”, “падвышэнне якасці паслуг і далейшае ўдасканаленне праваадносін у сферы аўтамабільных перавозак пасажыраў”.

Летась 14 лістапада тэма перавозак абмяркоўвалася на нарадзе ў Лукашэнкі.

“Хто не ўключаны ў гэты рэестр, апынаецца па-за законам, яго дзейнасць будзе выяўляцца і спыняцца кантралюючымі органамі, — сказаў Лукашэнка. — Гэта значыць табе дазволілі перавозіць людзей таксі і маршруткамі, ты ў рэестры — ідзі і вазі. Правілы будуць таксама вызначаныя”.

У выпадку перавозкі пасажыраў перавозчыкам, не ўключаным у рэестр, “крок налева, крок направа — найжорсткае пакаранне”, заявіў Лукашэнка.

Паводле яго слоў, за 9 месяцаў 2023 года праверана больш за 10 тыс. аўтамабіляў, якія перавозілі людзей. Выяўлена каля 9 тыс. парушэнняў. Былі выпадкі, калі ў маршрутных таксі, якія курсіруюць паміж гарадамі, пасажыраў перавозілі кіроўцы без неабходнай катэгорыі і допуску, без захавання рэжыму працы і адпачынку, тэхагляду аўтамабіля.